திருமுருகாற்றுப்படை - பத்துப்பாட்டு

ஆரம் தாழ்ந்த அம்பகட்டு மார்பின் செம்பொறி வாங்கிய மொய்ம்பின் சுடர்விடுபு	105
வண்புகழ் நிறைந்து வசிந்துவாங்கு நிமிர்தோள்

சந்தனப் பூச்சோடு முத்தாரம் தொங்கும் அவன் மேனியில் செம்புள்ளிகள் காணப்பட்டன. அவை அவன் வாங்கிக் கொண்ட தழும்புகள். வளம் மிக்க அவனது இரண்டு தோள்களில் பன்னிரண்டு கைகள்.

விண்செலல் மரபின் ஐயர்க்கு ஏந்தியது ஒருகை; உக்கம் சேர்த்தியது ஒருகை; நலம்பெறு கலிங்கத்துக் குறங்கின்மிசை அசைஇயதொருகை; அங்குசங் கடாவ ஒருகை,இருகை	110
ஐயிரு வட்டமொடு எஃகுவலந் திரிப்ப, ஒருகை மார்பொடு விளங்க ஒருகை ஒருகை தாரொடு பொலிய, ஒருகை கீழ்வீழ் தொடியொடு மீமிசைக்கொட்ப, ஒருகை பாடின் படுமணி இரட்ட, ஒருகை	115
நீனிற விசும்பின் மலிதுளி பொழிய, ஒருகை வானர மகளிர்க்கு வதுவை சூட்ட, ஆங்குஅப் பன்னிரு கையும் பாற்படஇயற்ற

மாம்பழத்திற்காக விண்ணில் சென்று வந்தபின் ஒருகை தன் அண்ணனிடம் ஏந்தியது. ஒருகை தன் தலையின்மேல் வைத்துக் கொண்டிருக்கிறது. ஒருகை தன் தொடை ஆடையின்மேல் உள்ளது. ஒருகை தன் யானைமேல் அங்குசத்தை வீசிக்கொண்டிருக்கிறது. ஒருகையில் வேல். ஒருகையில் பதின்மடி விசிறி. மார்பில் ஒருகை. ஒருகையில் மாலை. ஒருகையில் வளையல். ஒருகையில் மணி. ஒருகை மழை பொழிகிறது. ஒருகை தன்முன் நடனமாடும் வானர மகளிர்க்கு மணமாலை சூட்டிக் கொண்டிருக்கிறது.

அந்தரப் பல்லியம் கறங்கத் திண்காழ் வயிர்எழுந் திசைப்ப, வால்வளை ஞரல	120
உரந்தலைக் கொண்ட உருமிடி முரசமொடு பல்பொறி மஞ்ஞை வெல்கொடி அகவ, விசும்பஆ றாக விரைசெலல் முன்னி, உலகம் புகழ்ந்த ஓங்குயர் விழுச்சீர் அலைவாய்ச் சேறலும் நிலைஇய பண்பேஅதான்று	125

இப்படிப் பன்னிரண்டு கைகளும் பல்வேறு செயல்களைச் செய்து கொண்டிருக்கும்போது அவனைச் சுற்றிப் பல முழக்கங்கள் எழுகின்றன. கொம்பு சங்கு முரசம் முதலான பல்வேறு இசைக் கருவிகள் முழங்குகின்றன. அவனது கொடியிலிருக்கும் மயில் அகவுகிறது. இவற்றிற்கு இடையே திருச்சீரலைவாய் என்னும் திருச்செந்தூரிலிருந்து விசும்பு வழியாக விரைந்து செல்ல அவன் திட்டம் தீட்டுகிறான். அவன் செல்வதற்கு முன் நீ அவனிடம் சென்றால் அவனது அருளைப் பெற்று விடலாம். அதுவன்றி…