குறுந்தொகை - 257. குறிஞ்சி - தலைவி கூற்று
(வரைவுணர்த்திய தோழியை நோக்கி, "தலைவனைக் கண்ட போது இன்பமும் அவனைக் காணாத போது துன்பமும் உடையேனாக இருந்தேன். இனி எப்பொழுதும் உடனுறைதலால் இன்பமே உண்டாகும்" என்பதுபடத்தலைவி கூறியது.)
| வேரு முதலும் கோடு மோராங்குத் தொடுத்த போலத் தூங்குபு தொடரிக் கீழ்தாழ் வன்ன வீழ்கோட் பலவின் ஆர்கலி வெற்பன் வருதொறும் வரூஉம் அகலினும் அகலா தாகி |
5 |
| இகலுந் தோழிநங் காமத்துப் பகையே. | |
| - உறையூர்ச் சிறுகந்தனார். |
தோழி! நம்மிடத்து உள்ள காமமாகிய பகை வேரிலும் அடிமரத்திலும் கிளையிலும் ஒரு படியாக தொடுத்து வைத்தன போல தொங்கித் தொடர்ந்து கீழே தாழ்ந்தாற் போன்ற தணிந்த குலைகளை உடைய பலா மரத்தினை உடைய ஆரவாரத்தை உடைய மலைக்குத் தலைவன் இங்கே வருந்தோறும் வெளிப்படும்; அவன் அகன்றாலும் போகாததாகி மாறுபடும்; இஃது என்ன வியப்பு!
முடிபு: தோழி, காமத்துப் பகை, வெற்பன் வருதொறும் வரூஉம்;அகலினும் இகலும்.
கருத்து: தலைவனைப் பிரிதலின்றி ஒன்றியிருத்தலே எனக்கு இன்பம் பயப்பது.
தேடல் தொடர்பான தகவல்கள்:
குறுந்தொகை - 257. குறிஞ்சி - தலைவி கூற்று, இலக்கியங்கள், குறிஞ்சி, குறுந்தொகை, உடைய, தலைவி, கூற்று, அகலினும், காமத்துப், தோழி, வரூஉம், போது, எட்டுத்தொகை, சங்க, வெற்பன், வருதொறும்