குறுந்தொகை - 197. நெய்தல் - தலைவி கூற்று

யாதுசெய் வாங்கொல் தோழி நோதக நீரெதிர் கருவிய காரெதிர் கிளைமழை ஊதையங் குளிரொடு பேதுற்று மயங்கிய கூதிர் உருவிற் கூற்றம் காதலர்ப் பிரிந்த எற்குறித்து வருமே.	5
- கச்சிப்பேட்டு நன்னாகையார்.

தோழி! நோதல் பொருந்தும்படி நீரை ஏற்றுக் கொண்ட மின் முதலியதொகுதியை யுடையனவாகிய கார்காலத்தை ஏற்றுக் கொண்ட கிளைத்த மழையையுடைய ஊதைக் காற்றினது குளிர்ச்சியோடு மிக மயங்கிக் கலந்த கூதிர்க் காலமாகிய உருவத்தையுடைய கூற்றம் தலைவரைப் பிரிந்திருக்கும்என்னைக் கொல்லுதல் குறித்து வாரா நின்றது; யாதுசெய்வாம்!

முடிபு: தோழி, கூதிர் உருவிற் கூற்றம் எற்குறித்து வரும்; யாதுசெய்வாம்?    

கருத்து: தலைவர் கூதிர்க் காலத்தும் வந்திலராதலின் இனி உயிர்வாழேன்.