குறுந்தொகை - 166. நெய்தல் - தோழி கூற்று

தண்கடற் படுதிரை பெயர்த்தலின் வெண்பறை நாரை நிரைபெயர்ந் தயிரை யாரும் ஊரோ நன்றுமன் மரந்தை ஒருதனி வைகிற் புலம்பா கின்றே.
- கூடலூர் கிழார்.

குளிர்ந்த கடற்கண்ணே உண்டாகும் அலைகள் மீன்களைப் பெயரச் செய்வதனால் வெள்ளிய சிறகுகளையுடைய நாரையின் வரிசை நீங்கி அயிரை மீனை உண்ணுதற் கிடமாகிய ஊராகியமரந்தை தலைவனோடு இருக்குங்கால் மிக நன்மையையுடையது; தலைவனைப் பிரிந்து தனியே தங்குவேமாயின் வருத்தத்தைத் தருவதற்குக் காரணமாகின்றது.

முடிபு: மரந்தை நன்றுமன்; தனிவைகிற் புலம்பாகின்று.    

கருத்து: தலைவனைப் பிரிந்திருத்தல் துன்பத்துக்குக் காரணமாகின்றது.