குறுந்தொகை - 131. பாலை - தலைவன் கூற்று
(தலைவியைப் பிரிந்துவந்த தலைவன் தான் மேற்கொண்ட முயற்சி முற்றுப்பெற்றபின் தலைவிபால் மீள எண்ணி, “தலைவியின் ஊர் நெடுந்தூரத்தில் உள்ளது; “அவள்பாற் செல்வதற்கு என் நெஞ்சம் மிக விரைகின்றது” என்று கூறியது.)
| ஆடமை புரையும் வனப்பிற் பணைத்தோள் பேரமர்க் கண்ணி யிருந்த ஊரே நெடுஞ்சேண் ஆரிடை யதுவே நெஞ்சே ஈரம் பட்ட செவ்விப் பைம்புனத்து ஓரேர் உழவன் போலப் |
5 |
| பெருவிதுப் புற்றன்றால் நோகோ யானே. | |
| - ஒரேருழவனார். |
அசைகின்ற மூங்கிலை யொத்த அழகினையும் பருமையையும் உடைய தோளையும் பெரிய அமர்த்தலையுடைய கண்ணையும் பெற்ற தலைவி இருந்த ஊர நெடுந்தூரத்தின்கண் அடைதற்கரிய இடத்தில் உள்ளது; எனது நெஞ்சானது ஈரம் உண்டாகிய செவ்வியையுடைய பசிய புனத்தையுடைய ஒற்றை ஏரையுடைய உழவனைப்போல பெரிய விரைவை அடைந்தது; அதனால் நான் வருந்துவேன்.
முடிபு: கண்ணி இருந்த ஊர் நெடுஞ்சேணாரிடையது; நெஞ்சு பெருவிதுப்புற்றன்று; யான் நோகு.
கருத்து: யான் கூறிவந்த பருவம் வந்தமையின் என் நெஞ்சம் தலைவியை அடைய அவாவுகின்றது.
தேடல் தொடர்பான தகவல்கள்:
குறுந்தொகை - 131. பாலை - தலைவன் கூற்று, தலைவன், இலக்கியங்கள், கூற்று, குறுந்தொகை, பாலை, பெரிய, இருந்த, யான், ஈரம், உள்ளது, எட்டுத்தொகை, சங்க, நெஞ்சம், கண்ணி