புலம்பெயர் நாடக அரங்கு - வளர்ச்சியும் பிரச்சினைகளும் - நாடகக் கலைக் கட்டுரைகள்

"பல்வேறுபட்ட ஆற்றல்கள் சங்கமிக்கும் ஒரு களம் இது. பார்வையாளர் முன்னே நிகழ்த்தப்பட வேண்டிய கூத்து. வேலைபார்த்த களைப்பின் வியர்வை காய்வதன்முன்பே அரிதாரம் பூசிக்கொண்டு ஒளிப்பொட்டின் முன்னால் நிற்கவேண்டிய அவசரத்தை லண்டனின் பரபரப்பில் ஒருபோதும் தவிர்க்கமுடியாது. குடும்பம் வைத்து, சமைத்து, சூப்பர் மார்கட்டில் சமான்கள் வாங்கி, பிள்ளைகள் வளர்த்து, வேலைபார்த்து அவதியுறும் கலைஞர்கள் தான் லண்டனில் நாடக அரங்கில் தோற்றம் தருகிறார்கள். ஒரு நாடக இயக்கத்தில் பிடிப்பும் ஈடுபாடும் மிகுந்த கலைஞர்களின் அர்ப்பணிப்பின் அறுவடை இது. ஒரு நாடகக் கலைஞன் 24 மணி நேரமும் சும்மா இருக்கிறார் என்றாலும் அவரோடு சேர்ந்து செயற்பட இன்னுமொரு கலைஞனுக்கு ஒரு மணி நேரம் அவகாசம்கூட இல்லையென்றால் இங்கு எதுவுமே நிகழ முடியாது. தனி ஆவர்த்தனங்களை நாம் இங்கு கணக்கில் கொள்வேண்டியதில்லை. சக கலைஞனின் இணைவோ, ஊடாட்டமோ இல்லாமல் இங்கு ஒரு புள்ளியுமே அசைவதில்லை. பல்வேறு ஆற்றல்களை கூறப்பட்ட காலத்தின் வேகத்தில் தொகுத்து ஒரு நாடக நிகழ்வை மேற்கொள்வது என்பது உடல் ரீதியிலும் பாரிய எத்தனங்களை வேண்டி நிற்பதாகும்".(5)

முன் அனுபவம் இல்லாத நிலையிலும் சஞ்சிகைகளை வெளியிட முனைந்த துணிச்சல் தீவிர நாடகத்துறையைப் பொறுத்தவரையில் காணப்படவில்லை. நாடகமேடையேற்றம் வேண்டிநிற்கும் கூட்டு முயற்சியும், பல்துறை சார்ந்த ஆற்றல்களைப் பெற்றுக்கொள்ள வேண்டிய தேவையும் இப்படியான தயக்கங்களுக்கு முக்கிய காரணமாக இருந்திருக்கக்கூடும். பல்வேறு ஆற்றல்களை இணைத்து செயற்படுத்தும் பயிற்சியும் மனோபாவமும் இல்லாவிட்டால் தீவிர நாடக மேடையேற்றம், தயாரிப்பு ஒரு பிரமிப்பை ஏற்படுத்தலாம். சட்டரீதியான வதிவிட அனுமதிக் கட்டுப்பாடு காரணமாகவும் ஜேர்மனி போன்ற இடங்களில் ஒரு குழுவாகப் பல கலைஞர்களை ஓரிடத்தில் ஒருங்கு சேர்ப்பது சாத்தியமற்றதாகவும் இருந்தது. பாரிஸ், லண்டன் போன்ற இடங்களில் இக்கட்டுப்பாடு இல்லை. ஜேர்மனி போன்ற இடங்களில் கலை இலக்கியத் துறைகளில் ஈடுபாடுகொண்ட இலக்கிய ஆர்வலர்கள் நாடகத்தை மேடையேற்றுவதிலும் அதே அளவு ஆர்வம் கொண்டிருந்த போதிலும், அந்த ஆற்றல்களை ஒருங்கிணைந்து கொண்டு செல்லத்தக்க நாடக ஆளுமைகளோ அல்லது நாடக அமைப்போ அங்கு இல்லாமலிருந்தது. பின்னாளில் ஜேர்மனிய நாடகப் பட்டறைகளில் பயிற்சிபெற்ற நாடக ஆர்வலர்கள் சில சீரிய நாடகங்களை மேடையேற்றினர். ஆயினும் ஒரு தொடர்ந்த நாடக இயக்கமாக பரிணமிக்க இயலவில்லை. டென்மார்க்கிலும் இதே நிலைதான்.

பாரிசில் நாடக முயற்சிகளின் நிலைமை சற்று வித்தியாசமானது. இலங்கையில் நகைச்சுவைப் பாங்கான நாடகங்களிலும், புராண-வரலாற்று நாடகங்களிலும் நடித்த நீண்ட கால நடிப்பு அனுபவங்களுடன் கூடிய திறமையுள்ள கலைஞர்கள் பாரிசில் பல கலைக்குழுக்களாக இயங்கி வந்திருக்கிறார்கள். நாடகம் என்று தாங்கள் உணர்ந்து கொண்ட கலைவடிவத்திற்கு அவர்கள் பூரணவிசுவாசிகளாக நிறைந்த அர்ப்பணிப்புகளைச் செய்தபோதும், நவீன நாடகச் செழுமையை இவர்களால் தரமுடியாமல் இருந்தது. புதிய நாடக வடிவங்களைப் பயிலவும், அவற்றைப் பரீட்சித்துப் பார்க்கவும் இந்தக் குழுக்கள் ஆர்வம் கொண்டிருந்தன. அண்மைக் காலத்தில் இந்த நாடகக் கலைஞர்கள் பலர், தமிழ் வீடியோ திரைப்படத் தயாரிப்பில் பெருவாரியாக ஈடுபட்டிருந்தமையால் மேடையில் புதிய சாத்தியப்பாடுகளுக்கு இவர்களது பங்களிப்பு சாத்தியம் இல்லாமல் போய்விட்டது. ஐரோப்பாவில் ஆங்காங்கே அவ்வப்போது சீரிய நாடக முயற்சிகள் நடந்த போதும், லண்டனிலேயே தீவிர நாடக முயற்சிகள் பிரக்ஞை பூர்வமாக தொடர்ந்த செயற்பாடாக நிகழ்ந்திருக்கிறது.

4. லண்டனில் தமிழ்க் கலாசாரச் சூழல் :

லண்டனில் கலை நிகழ்ச்சிகள் அடிக்கடி நடைபெறுகின்றன. கூடுதலாக, பரதம், கர்நாடக சங்கீதம், சினிமா இசை நிகழ்ச்சிகளே.

"இலங்கையில் இருந்து புலம்பெயர்ந்து, பெருமளவு தமிழர் லண்டனில் நிலைகொண்டபோது இக்கலைகள் மீதான நேரடி ஈடுபாடு பிள்ளைகள் மூலமாக பெருமளவில் ஏற்பட ஆரம்பித்தது. விளைவாக, இங்கேயே வாழ்கின்ற கலைஞர்களும், மாணவர்களும், பிள்ளைகளும் கலந்து கொள்ளும் நிகழ்ச்சிகள் பெருக ஆரம்பித்தன. வார இறுதியில் எங்கு, எந்த நிகழ்ச்சிக்குச் செல்வது என்ற சங்கடமான நிலைமை இப்பொழுது எழுந்துள்ளது. கோடை விடுமுறை இதில் உச்சம். ஆக, இந்தக் கலை ஈடுபாட்டுக்கான காரணங்கள் பலவாக இருக்கின்றன. மாறுபட்ட கலாசார சூழலில் வாழும் தமது பிள்ளைகள், அந்தக் கலாசார பழக்க வழக்கங்களோடு அள்ளுண்டு சென்றுவிடாதபடி அவர்களைத் தடுக்கும் முயற்சியாக அவர்களின் நேரத்தை, ஈடுபாட்டை இவற்றில் செலுத்த முயல்வது அவற்றில் முக்கியமான ஒரு காரணம். பிள்ளைகளுக்கு இக்கலைகளைப் பயிற்றுவிக்க வேண்டும் என்ற இயல்பான காரணமும் பலருக்கு உண்டு. இவை தவிர எங்குமே உள்ள விதத்திலான வேறும் பல காரணங்களும் இருக்கின்றன. இந்த ஈடுபாடுகள் அனைத்தும் 'அரங்கேற்றங்களாக' வடிவெடுகின்றன.

லண்டனில் தீவிர நாடக முயற்சிகளை ஆராயும்போது நாம் பின்வரும் அடிப்படையில் பார்ப்பது பொருத்தமாக இருக்கும்.