ஐந்தாம் திருமுறை-தேவாரப் பதிகங்கள் - 5.037.திருக்கடவூர்வீரட்டம்
5.037.திருக்கடவூர்வீரட்டம்
திருக்குறுந்தொகை
திருச்சிற்றம்பலம்
திருக்குறுந்தொகை
திருச்சிற்றம்பலம்
இத்தலம் சோழநாட்டிலுள்ளது.
சுவாமிபெயர் - பிரமபுரீசுவரர்.
தேவியார் - மலர்க்குழல்மின்னம்மை.
1437 | மலைக்கொ ளானை மயக்கிய வல்வினை நிலைக்கொ ளானை நினைப்புறு நெஞ்சமே கொலைக்கை யானையுங் கொன்றிடு மாதலால் கலைக்கை யானைகண் டீர்கட வூரரே. |
5.037.1 |
திருக்கடவூரில் மேவும் பெருமான், மலையில் வாழும் யானை போன்று மயக்கம் செய்த கொடிய வினைகளுக்கே நிலைக்களமாய் யானைபோன்று அடங்காது பலவற்றையும் நினைக்கின்ற நல்வினைகளாகிய யானைகளையும் ஏனைய மதயானையையும் அழிக்கும் இயல்பினர் கலையின் பயனாகிய ஒழுக்கத்தால் அடையத்தகும் யானை போன்றவர்.
1438 | வெள்ளி மால்வரை போல்வதொ ரானையார் உள்ள வாறெனை யுள்புகு மானையார் கொள்ள மாகிய கோயிலு ளானையார் கள்ள வானைகண் டீர்கட வூரரே. |
5.037.2 |
வெள்ளிமால்வரை போன்ற அயிராவணம் என்னும் ஒப்பற்ற ஆனையை உடையார்; உள்ளவாறே என் உள்ளத்தில் புகுகின்ற ஆனைபோல்வார்; கொள்ளும் இடமாகிய கோயிலுள் ஆனையாய் உள்ளவர்; ஆதலின் கடவூர்த்தலத்து இறைவர் கள்ளம் உடைய ஆனைபோல்வார்; காண்பீர்களாக.
1439 | ஞான மாகிய நன்குண ரானையார் ஊனை வேவ வுருக்கிய வானையார் வேன லானை யுரித்துமை யஞ்சவே கான லானைகண் டீர்கட வூரரே. |
5.037.3 |
ஞானமாகிய நன்குணரத்தக்க ஆனையார்; உடற்பொதியைமேவுமாறு உருக்கி உள்ளொளிபெருக்கும் ஆனையார்; ஆனையை உமாதேவியார் அஞ்சுமாறு உரித்த கடவூர்த் தலத்து இறைவர்; கானல் ஆனையும் போல்வர்; காண்பீர்களாக.
1440 | ஆல முண்டழ காயதொ ரானையார் நீல மேனி நெடும்பளிங் கானையார் கோல மாய கொழுஞ்சுட ரானையார் கால வானைகண் டீர்கட வூரரே. |
5.037.4 |
நஞ்சினை உண்டும் அழகுபெற்ற ஆனையார்; நீல மேனியை ஒருபாகத்தே உடைய நீண்ட பளிங்கனைய ஆனையார்; கொழுவிய சுடர்விடும் கோலம் உடைய ஆனையார்; கடவூர்த் தலத்திறைவர் கால ஆனை போல்வர்; காண்பீர்களாக.
1441 | அளித்த ஆன் அஞ்சு மாடிய வானையார் வெளுத்த நீள்கொடி யேறுடை யானையார் எளித்த வேழத்தை எள்குவித் தானையார் களித்த வானைகண் டீர்கட வூரரே. |
5.037.5 |
அன்பர்கள் பரிந்து கொடுக்கும் பஞ்ச கவ்வியங்களை ஆடிய ஆனையார்; வெண்மையான இடபக்கொடி உடைய ஆனையார்; இகழ்ந்து வந்த யானையினை எல்லோரும் எள்குமாறு உரித்த ஆனையார்; கடவூர்த்தலத்திறைவர் களிப்புற்ற யானை போல்வர்; காண்பீர்களாக.
1442 | விடுத்த மால்வரை விண்ணுற வானையார் தொடுத்த மால்வரை தூயதொ ரானையார் கடுத்த காலனைக் காய்ந்ததொ ரானையார் கடுத்த வானைகண் டீர்கட வூரரே. |
5.037.6 |
விடுத்த பெரியமலையை விண்ணுற நிமிர்க்கும் ஆனையார்; தொடுத்த பெரியமலை தூய்மையாக உடைய ஆனையார்; சினந்துவந்த காலனைக் காய்ந்த ஒப்பற்ற கடவூர்த்தலத்திறைவர் சினத்தலுற்ற ஆனைபோல்வர்; காண்பீர்களாக.
1443 | மண்ணு ளாரை மயக்குறு மானையார் எண்ணு ளார்பல ரேத்திடு மானையார் விண்ணு ளார்பல ரும்மறி யானையார் கண்ணு ளானைகண் டீர்கட வூரரே. |
5.037.7 |
மண்ணுலகின் உள்ளாரை மயக்கம் உறுவிக்கும் ஆனையார்; எண்ணிக்கையிற் பெருகிய நல்லடியார் பலர் ஏத்தித்தொழும் ஆனையார்; விண்ணுலகின்கண் உள்ள தேவர்கள் பலரும் அறிகின்ற ஆனையார்; கடவூர்த்தலத்து இறைவர் காதலாகித் தொழும் அடியார் கண்ணுள் நின்று காட்சி வழங்கும் ஆனைபோல்வர்; காண்பீர்களாக.
1444 | சினக்குஞ் செம்பவ ளத்திர ளானையார் மனக்கும் வல்வினை தீர்த்திடு மானையார் அனைக்கும் அன்புடை யார்மனத் தானையார் கனைக்கு மானைகண் டீர்கட வூரரே. |
5.037.8 |
சினக்கின்ற செம்பவளத் திரள்களை உடைய ஆனையார்; மனத்தின்கண் நிறைந்த வல்வினைகளைத் தீர்க்கும் ஆனையார்; அன்னைக்கும் மேலாகிய அன்புடையார் மனத்து உறையும் ஆனையார்; கடவூர்த்தலத்து இறைவர் ஒலித்து முழங்கி வரும் ஆனைபோல்வர்; காண்பீர்களாக.
1445 | வேத மாகிய வெஞ்சுட ரானையார் நீதி யானில னாகிய வானையார் ஓதி யூழி தெரிந்துண ரானையார் காத லானைகண் டீர்கட வூரரே. |
5.037.9 |
வேதங்களாய் அதன் ஒளியாய் விளங்கும் ஆனைபோன்றவர். நீதிமுறை விளங்க நிலத்தின்கண் தோன்றியவர் என்க. வேதங்களை ஓதி பல ஊழிகளையும் கண்டறிந்தவர். அன்பர்க்கன்பர் கடவூர் இறைவர்; காண்பீர்களாக.
1446 | நீண்ட மாலொடு நான்முகன் தானுமாய்க் காண்டு மென்றுபுக் கார்க ளிருவரும் மாண்ட வாரழ லாகிய வானையார் காண்ட லானைகண் டீர்கட வூரரே. |
5.037.10 |
நெடியோனாகிய திருமாலும், நான்முகனும் காண்போம் என்று ஆணவத்தாற் கருதிப் புகுந்தும் காண்டற்கரியவராய் மாட்சி உடைய பேரழலாக நிமிர்ந்த ஆனையார்; கடவூர்த் தலத்து இறைவர் காண்டற்குரிய ஆனைபோல்வர்; காண்பீர்களாக.
1447 | அடுத்து வந்த இலங்கையர் மன்னனை எடுத்த தோள்க ளிறநெரித் தானையார் கடுத்த காலனைக் காய்ந்ததொ ரானையார் கடுக்கை யானைகண் டீர்கட வூரரே. |
5.037.11 |
எடுப்பேன் என்று அடுத்துவந்த இலங்கைவேந்தனை எடுக்கலுற்ற இருபது தோள்களும் இறும் வண்ணம் நெரித்த ஆனையார்; சினந்த காலனைக் காய்ந்த ஆனையார்; கடவூர்த் தலத்து இறைவர் கொன்றையணிந்த ஆனைபோல்வர்; காண்பீர்களாக.
திருச்சிற்றம்பலம்
தேடல் தொடர்பான தகவல்கள்:
ஐந்தாம் திருமுறை-தேவாரப் பதிகங்கள் - 5.037.திருக்கடவூர்வீரட்டம் , ஆனையார், வூரரே, டீர்கட, காண்பீர்களாக, ரானையார், உடைய, இறைவர், வானையார், ஆனைபோல்வர், வானைகண், மானையார், காலனைக், கடவூர்த், தானையார், திருமுறை, கடுத்த, போல்வர், தலத்து, லானைகண், கடவூர்த்தலத்து, திருக்கடவூர்வீரட்டம், யானை, மால்வரை, மாகிய, வந்த, கடவூர்த்தலத்திறைவர், விடுத்த, விண்ணுற, தொடுத்த, தேவாரப், ளார்பல, ஐந்தாம், காய்ந்த, காய்ந்ததொ, பதிகங்கள், திருச்சிற்றம்பலம், உள்ள, மயக்கம், ளானையார், ஆனைபோல்வார், ஆனையை, யானைகண், உரித்த, நீண்ட, ஒப்பற்ற, ளானை, வல்வினை, யானையார்