முதல் திருமுறை-தேவாரப் பதிகங்கள் - 1.090.திருப்பிரமபுரம் - திருவிருக்குக்குறள்

திருப்பிரமபுர மென்பது சீர்காழி. இத்தலம் சோழநாட்டிலுள்ளது.

சுவாமிபெயர் - பிரமபுரீசர்.
தேவியார் - திருநிலைநாயகி.

969

அரனை யுள்குவீர், பிரம னூருளெம் பரனையே மனம், பரவி யுய்ம்மினே.

1.090.1

சிவபிரானைச் சிந்தித்துப் போற்ற விரும்பும் அன்பர்களே, பிரமனூரில் விளங்கும் பரனையே மனத்தால் பரவிப் போற்றி உய்வீர்களாக.

970

காண வுள்குவீர், வேணு நற்புரத் தாணு வின்கழல், பேணி யுய்ம்மினே.

1.090.2

சிவபிரானைக் கண்டு தொழ எண்ணும் அன்பர்களே, வேணுபுரத்தில் விளங்கும் தாணுவின் திருவடிகளைப் பேணி உய்வீர்களாக.

971

நாத னென்பிர்காள், காத லொண்புகல் ஆதி பாதமே, ஓதி யுய்ம்மினே.

1.090.3

சிவபெருமானை எம் தலைவன் எனக் கூறும் அன்பர்களே! அன்போடு ஒளி விளங்கும் புகலிப் பதியில் விளங்கும் ஆதியின் திருவடிப் பெருமைகளை ஓதி உய்வீர்களாக.

972

அங்க மாதுசேர், பங்க மாயவன் வெங்குரு மன்னும், எங்க ளீசனே.

1.090.4

அருள் வழங்கும் குறிப்போடு உமையம்மையைத் தனது திருமேனியின் ஒரு பாகமாகக் கொண்டுள்ளவன், வெங்குருவில் நிலையாக உள்ள எங்கள் ஈசன் ஆவான்.

973

வாணி லாச்சடைத், தோணி வண்புரத் தாணி நற்பொனைக், காணு மின்களே.

1.090.5

ஒளி பொருந்திய, பிறைமதி பொருந்திய சடைமுடி உடையவனாய்த் தோணிபுரத்தில் விளங்கும் ஆணிப் பொன் போன்ற இறைவனைக் கண்டு தொழுவீர்களாக.

974

பாந்த ளார்சடைப், பூந்த ராய்மன்னும் ஏந்து கொங்கையாள், வேந்த னென்பரே.

1.090.6

பாம்பு பொருந்திய சடைமுடியோடு பூந்தராயில் விளங்கும் பெருமானை, ஏந்திய தனபாரங்களை உடைய உமையம்மையின் கணவன் என்று கூறுவார்கள்.

975

கரிய கண்டனைச், சிரபு ரத்துளெம் அரசை நாடொறும், பரவி யுய்ம்மினே.

1.090.7

கருமை பொருந்திய கண்டத்தை உடையவனாய்ச், சிரபுரத்துள் எழுந்தருளிய அரசனை நாள்தோறும் பரவி உய்வீர்களாக.

976

நறவ மார்பொழிற், புறவ நற்பதி இறைவ னாமமே, மறவ னெஞ்சமே.

1.090.8

தேன் பொருந்திய சோலைகளை உடைய புறவமாகிய நல்ல ஊரில் எழுந்தருளிய இறைவன் திருநாமங்களை, நெஞ்சமே! நீ மறவாதே.

977

தென்றி லரக்கனைக், குன்றிற் சண்பைமன் அன்று நெரித்தவா, நின்று நினைமினே.

1.090.9

தென் திசையிலுள்ள இலங்கை மன்னனாம் இராவணனாகிய அரக்கனைச் சண்பை மன்னனாகிய சிவபிரான் கயிலை மலையிடைப்படுத்து அன்று நெரித்த வரலாற்றை நின்று நினைத்துப் போற்றுவீர்களாக.

978

அயனு மாலுமாய், முயலுங் காழியான் பெயல்வை யெய்திநின், றியலு முள்ளமே.

1.090.10

பிரமனும் திருமாலும் அடிமுடி தேடி முயலும் பரம்பொருளாகிய சீகாழிப் பதியில் விளங்கும் இறைவனது கருணைப் பொழிவைச் சார்ந்து நின்று நினைக்கும் என் உள்ளம்.

979

தேர ரமணரைச், சேர்வில் கொச்சைமன் நேரில் கழனினைந், தோரு முள்ளமே.

1.090.11

புத்தர் சமணர் ஆகியோரை அணுகாத, கொச்சை வயத்து மன்னனாகிய சிவபிரானின் ஒப்பற்ற திருவடிகளை நினைந்து தியானிக்கும் என் உள்ளம்.

980

தொழும னத்தவர், கழும லத்துறை பழுதில் சம்பந்தன், மொழிகள் பத்துமே.

1.090.12

கழுமலத்தில் உறையும் குற்றமற்ற ஞான சம்பந்தன் அருளிய மொழிகளாகிய, இத்திருப்பதிகப் பாடல்களை ஓதி, பெருமானைத் தொழும் மனத்தவர் ஆகுக.