முதல் திருமுறை-தேவாரப் பதிகங்கள் - 1.020.திருவீழிமிழலை - திருவிராகம்

இத்தலம் சோழநாட்டிலுள்ளது.

சுவாமிபெயர் - வீழியழகர்.
தேவியார் - சுந்தரகுசாம்பிகை.

206

தடநில வியமலை நிறுவியொர் தழலுமிழ் தருபட வரவுகொ டடலசு ரரொடம ரர்களலை கடல்கடை வுழியெழு மிகுசின விடமடை தருமிட றுடையவன் விடைமிசை வருமவ னுறைபதி திடமலி தருமறை முறையுணர் மறையவர் நிறைதிரு மிழலையே.

1.020.1

பெரியதாகிய மந்தரமலையை மத்தாக நிறுத்தி அழல் போலும் கொடிய நஞ்சை உமிழும் படத்தோடு கூடிய வாசுகி என்னும் பாம்பைக் கயிறாகக் கட்டி வலிய அசுரர்களோடு தேவர்கள் அலைகள் பொருந்திய திருப்பாற்கடலைக் கடைந்த விடத்துத் தோன்றிய உக்கிரமான ஆலகாலம் என்னும் நஞ்சு அடைந்த கண்டத்தை உடையவனும், விடையின்மீது வருபவனும் ஆகிய சிவபிரான் உறையும் தலம். நான்மறைகளை முறையாக ஓதி உணர்ந்த உறுதி வாய்ந்த மறையவர் நிறைந்துள்ள திருவீழிமிழலையாகும்.

207

தரையொடு திவிதல நலிதரு தகுதிற லுறுசல தரனது வரையன தலைவிசை யொடுவரு திகிரியை யரிபெற வருளினன் உரைமலி தருசுர நதிமதி பொதிசடை யவனுறை பதிமிகு திரைமலி கடன்மண லணிதரு பெறுதிடர் வளர்திரு மிழலையே.

1.020.2

மண்ணுலகத்தோடு விண்ணுலகையும் நலிவுறுத்துகின்ற வலிமை பொருந்திய சலந்தராசுரனின் மலை போன்ற தலையை வேகமாக அறுத்து வீழ்த்திய சக்கராயுதத்தைத் திருமால் வேண்ட அவர்க்கு அருளியவனும், புகழால் மிக்க கங்கை நதி மதி ஆகியன பொதிந்த சடைமுடியை உடையவனுமாகிய சிவபெருமான் உறையும் தலம், பெரிய அலைகளை உடைய கடற்கரை, மணலால் அழகுபெறும் மணல் மேடுகள் நிறைந்த திருவீழிமிழலையாகும்.

208

மலைமக டனையிகழ் வதுசெய்த மதியறு சிறுமன வனதுயர் தலையினொ டழலுரு வனகர மறமுனி வுசெய்தவ னுறைபதி கலைநில வியபுல வர்களிடர் களைதரு கொடைபயில் பவர்மிகு சிலைமலி மதிள்புடை தழுவிய திகழ்பொழில் வளர்திரு மிழலையே.

1.020.3

மலைமகளாகிய பார்வதிதேவியை இகழ்ந்த அறிவற்ற அற்ப புத்தியையுடைய தக்கனுடைய தலையோடு அழலோனின் கை ஒன்றையும் அரிந்து, தன் சினத்தை வெளிப்படுத்திய சிவபிரான் உறையும் தலம், கலை ஞானம் நிரம்பிய புலவர்களின் வறுமைத்துன்பம் நீங்க நிறைந்த செல்வத்தை வழங்கும் கொடையாளர்கள்வாழ்வதும் பெரிய மதில்களால் சூழப் பெற்றதும் விளங்குகின்ற பொழில்கள் வளர்வதுமாய திருவீழிமிழலையாகும்.

209

மருவலர் புரமெரி யினின்மடி தரவொரு கணைசெல நிறுவிய பெருவலி யினனல மலிதரு கரனுர மிகுபிண மமர்வன இருளிடை யடையுற வொடுநட விசையுறு பரனினி துறைபதி தெருவினில் வருபெரு விழவொலி மலிதர வளர்திரு மிழலையே.

1.020.4

பகைமை பாராட்டிய திரிபுராதிகளின் முப்புரங்களும் எரியில் அழியுமாறு கணை ஒன்றைச் செலுத்திய பெரு வலிபடைத்தவனும், நன்மைகள் நிறைந்த திருக்கரங்களை உடையவனும், வலிய பிணங்கள் நிறைந்த சுடுகாட்டில் நள்ளிருட்போதில் சென்று அங்குத் தன்னை வந்தடைந்த பேய்களோடு நடனமாடி இசை பாடுபவனுமாகிய பரமன் மகிழ்வோடு உறையும் பதி, தெருக்கள் தோறும் நிகழும் பெருவிழாக்களின் ஆரவாரம் நிறைந்து வளரும் திருவீழிமிழலையாகும்.

210

அணிபெறு வடமர நிழலினில் அமர்வொடு மடியிணை யிருவர்கள் பணிதர வறநெறி மறையொடும் அருளிய பரனுறை விடமொளி மணிபொரு வருமர கதநில மலிபுன லணைதரு வயலணி திணிபொழி றருமண மதுநுகர் அறுபத முரல்திரு மிழலையே.

1.020.5

அழகிய கல்லால மரநிழலில் எழுந்தருளியிருந்து தம் திருவடி இணைகளைச் சனகர் சனந்தனர் ஆகிய இருவர் ஒருபுறமும், சனாதனர் சனற்குமாரர் ஆகிய இருவர் மறுபுறமும் பணிய அவர்கட்கு அறநெறியை வேதங்களோடும் அருளிச் செய்த சிவபிரான் உறையும் இடம், ஒளி பொருந்திய மணிகள் ஒப்பில்லாத மரகதம் ஆகியவற்றை அடித்துவரும் ஆற்றுநீர் நிலமெல்லாம் நிறைந்து வளங்களால் அணி செய்யப் பெறுவதும் செறிந்த பொழில்கள்தரும் மணத்தை நுகரும் வண்டுகள் முரல்வதுமான திருவீழிமிழலையாகும்.

211

வசையறு வலிவன சரவுரு வதுகொடு நினைவரு தவமுயல் விசையன திறன்மலை மகளறி வுறுதிற லமர்மிடல் கொடுசெய்து அசைவில படையருள் புரிதரும் அவனுறை பதியது மிகுதரு திசையினின் மலர்குல வியசெறி பொழின்மலி தருதிரு மிழலையே.

1.020.6

குற்றமற்ற வலிய வேடர் உருவைக் கொண்டு, நினைதற்கும் அரிய கடுந்தவத்தைச் செய்யும் விசயனுடையவலிமையை உமையம்மைக்கு அறிவுறுத்தும் வகையில் அவனோடு வலிய போரைத் தன் வலிமை தோன்றச் செய்து அவ்விசயனுக்குத் தோல்வி எய்தாத பாசுபதக்கணையை வழங்கி அருள்புரிந்த சிவபிரான் உறையும் பதி, செறிந்த மரங்கள் திசைகள் எங்கும் மலர்கள் பூத்துக் குலாவும் செறிந்த பொழில்கள் நிறைந்துள்ள திருவீழிமிழலையாகும்.

212

நலமலி தருமறை மொழியொடு நதியுறு புனல்புகை யொளிமுதல் மலரவை கொடுவழி படுதிறன் மறையவ னுயிரது கொளவரு சலமலி தருமற லிதனுயிர் கெடவுதை செய்தவ னுறைபதி திலகமி தெனவுல குகள்புகழ் தருபொழி லணிதிரு மிழலையே.

1.020.7

நன்மைகள் பலவும் நிறைந்த வேத மந்திரங்களை ஓதி, ஆற்று நீர், மணப்புகை, தீபம், மலர்கள் ஆகியனவற்றைக் கொண்டு பூசை புரிந்து வழிபடும் மறையவனாகிய மார்க்கண்டேயனின் உயிரைக் கவரவந்த வஞ்சகம் மிக்க இயமனின் உயிர் கெடுமாறு உதைத்தருளிய சிவபிரான் உறையும்பதி, உலக மக்கள் திலகம் எனப் புகழ்வதும் பொழில்கள் சூழ்ந்துள்ளதுமான திருவீழிமிழலையாகும்.

213

அரனுறை தருகயி லையைநிலை குலைவது செய்ததச முகனது கரமிரு பதுநெரி தரவிரல் நிறுவிய கழலடி யுடையவன் வரன்முறை யுலகவை தருமலர் வளர்மறை யவன்வழி வழுவிய சிரமது கொடுபலி திரிதரு சிவனுறை பதிதிரு மிழலையே.

1.020.8

சிவபிரான் எழுந்தருளிய கயிலைமலையை நிலைகுலையச் செய்து அதனைப் பெயர்த்த பத்துத் தலைகளை உடைய இராவணனுடைய இருபது கரங்களும் நெரியுமாறு தன் கால்விரலை ஊன்றிய வீரக்கழல் அணிந்த திருவடிகளை உடையவனும், வரன் முறையால் உலகைப் படைக்கும் பூவின் நாயகனான பிரமன் வழி வழுவியதால் ஐந்தாயிருந்த அவன் சிரங்களில் ஒன்றைக் கிள்ளி எடுத்து அதன்கண் பலியேற்றுத் திரிபவனுமாகிய சிவபிரான் உறையும் பதி திருவீழிமிழலையாகும்.

214

அயனொடு மெழிலமர் மலர்மகள் மகிழ்கண னளவிட லொழியவொர் பயமுறு வகைதழ னிகழ்வதொர் படியுரு வதுவர வரன்முறை சயசய வெனமிகு துதிசெய வெளியுரு வியவவ னுறைபதி செயநில வியமதின் மதியது தவழ்தர வுயர்திரு மிழலையே.

1.020.9

நான்முகனும் அழகிய மலர்மகள் கேள்வனாகிய கண்ணனும் அளவிடமுடியாது அஞ்சி நிற்க, ஒரு சோதிப் பிழம்பாய்த் தோன்ற அவ்விருவரும் முறையாக சயசய எனப்போற்றித் துதிசெய்யுமாறு அண்டங்கடந்த அச்சிவபிரான் உறையும் பதி, வெற்றி விளங்கும் மதில்களில் மதி தோய்ந்து செல்லுமாறு உயர்ந்து தோன்றும் திருவீழிமிழலையாகும்.

215

இகழுரு வொடுபறி தலைகொடும் இழிதொழின் மலிசமண் விரகினர் திகழ்துவ ருடையுடல் பொதிபவர் கெடவடி யவர்மிக வருளிய புகழுடை யிறையுறை பதிபுனல் அணிகடல் புடைதழு வியபுவி திகழ்சுரர் தருநிகர் கொடையினர் செறிவொடு திகழ்திரு மிழலையே.

1.020.10

பிறரால் இகழத்தக்க உருவோடும் உரோமங்களைப் பறித்தெடுத்தலால் முண்டிதமான தலையோடும் இழி தொழில் மிகுதியாகப் புரியும் சமணர்களாகிய தந்திரசாலிகளும், விளங்கும் மருதந்துவராடையை உடலில் போர்த்துத் திரியும் சாக்கியர்களும் அழிந்தொழியத் தன் அடியவர்களுக்கு மிகவும் அருள் புரிபவனும் புகழாளனுமாகிய இறைவன் உறையும் பதி நீர்வளம் மிக்கதும் கடலாற் சூழப்பட்ட இவ்வுலகில் விளங்கும் சுரர் தருவாகிய கற்பகம் போன்ற கொடையாளர் மிக்கு விளங்குவதுமாகிய திருவீழிமிழலையாகும்.

216

சினமலி கரியுரி செய்தசிவ னுறைதரு திருமிழ லையைமிகு தனமனர் சிரபுர நகரிறை தமிழ்விர கனதுரை யொருபதும் மனமகிழ் வொடுபயில் பவரெழின் மலர்மகள் கலைமகள் சயமகள் இனமலி புகழ்மக ளிசைதர இருநில னிடையினி தமர்வரே.

1.020.11

சினவேகத்தோடு வந்த யானையை உரித்துப் போர்த்த சிவபிரான் எழுந்தருளிய திருவீழிமிழலையை, மிக்க செல்வங்களால் நிறைந்த மனமகிழ்வுடையவர் வாழும் சிவபுரநகரின் மன்னனும் தமிழ் விரகனுமாகிய ஞானசம்பந்தன் உரைத்த இத்திருப்பதிகப் பாடல்கள் பத்தையும் மனமகிழ்வோடு பயில்பவர் அழகிய திருமகள், கலைமகள், சயமகள், அவர்க்கு இனமான புகழ் மகள் ஆகியோர் தம்பால் பொருந்த, பெரிய இவ்வுலகின்கண் இனிதாக வாழ்வர்.