தொபியாசு ஆகமம் - பழைய ஏற்பாடு

¹ தோபி புறப்பட்டபோது அவன் வீட்டு நாயும் இவனைத் தொடர்ந்து சென்றது. அவன் திகிரிஸ் நதிக்கரையை அடைந்து முதன் முறையாக அங்குத் தங்கலானான்.

² அவன் நதியிலே கால் அலம்பப் போன போது, இதோ! பெரிய மீன் ஒன்று அவனை விழுங்க வந்தது.

³ தோபி அதைக் கண்டு அஞ்சி, "ஐயா, என்னை விழுங்க வருகிறதே!" என்று அலறினான்.

⁴ கடவுளின் தூதர் அவனை நோக்கி, "அதைச் செவுள்களாலே பிடித்து இழு" என்றார். அவனும் அவ்வாறே செய்து கரை வரை அதை இழுக்க, அது அவன் முன்பாகவே துடிதுடித்துச் செத்தது.

⁵ பின்னர் கடவுளின் தூதர் தோபியைப் பார்த்து, "மீனின் வயிற்றைக் கிழித்து, அதன் இதயத்தையும் பித்தப் பையையும் ஈரலையும் எடுத்துப் பத்திரமாய் வை. ஏனெனில் நல்ல மருந்துகளைத் தயாரிக்க அவை உதவும்" என்றார்.

⁶ அவனும் அவ்வண்ணமே செய்தான். பின்பு மீனின் ஒரு பகுதியை அப்போதைய தேவைக்கு எடுத்துக் கொண்டு போய்ப் பொரித்தார்கள். மீதியை உப்பு போட்டு மேதியருடைய இராஜேசு நகரை அடையும் வரைத் தங்கள் செலவுக்காகப் பத்திரப்படுத்தி வைத்துக் கொண்டார்கள்.

⁷ பிறகு தோபி கடவுளின் தூதரை நோக்கி, "சகோதரன் அசாரியாசே, நீ மீனிலிருந்து எடுத்துப் பதனப்படுத்தச் சொல்லியவை எதற்கு மருந்தாகும்? தயவுசெய்து சொல்" என்று கேட்டான்.

⁸ அதற்குக் கடவுளின் தூதர் அவனை நோக்கி, "அதனுடைய இதயத்தின் ஒரு பகுதியை நெருப்பில் போட்டால், அதிலிருந்து கிளம்பும் புகையானது ஆண், பெண் அனைவரிடமும் உள்ள எவ்விதப் பேய்களையும் ஓட்டி விடும். அதன் பின்னர் அவை அவர்களை நெருங்கா.

⁹ அதன் பித்த நீரையோ கண் படலமுள்ளவர்கள் கண்ணிலே பூசினால் அவர்கள் நலம் அடைவார்கள்" என்றார்.

¹⁰ அதன் பிறகு தோபி கடவுளின் தூதரைப் பார்த்து, "நாம் இன்று எங்கே தங்கலாம் என்று நினைக்கிறீர்?" என்று கேட்டான்.

¹¹ அதற்குத் தூதர், "இந்த ஊரில் உன் குலத்தினனும் உனக்கு உறவினனுமான இரகுவேல் வாழ்ந்து வருகிறான். சாராள் என்ற பெயர் கொண்ட ஒரு மகள் அவனுக்கு உண்டு. அவளைத் தவிர அவனுக்கு வேறு மகனோ மகளோ இல்லை.

¹² நீ அவளை உன் மனைவியாகக் கொள்வாயானால் அவனுடைய உடைமைகள் அனைத்தும் உனக்குக் கட்டாயம் வந்து சேரும்.

¹³ எனவே, அவளை உனக்கு மனைவியாகத் தரும்படி அவளுடைய தந்தையிடம் கேள். அவனும் அவளை உனக்கு மணம் செய்து கொடுப்பான்" என்றார்.

¹⁴ தோபி அவரை நோக்கி, "ஆனால் அவள் ஏழு கணவர்களுக்கு வாழ்க்கைப் பட்டிருந்ததாகவும், அவர்கள் அனைவருமே இறந்து விட்டதாகவும் கேள்விப்பட்டேனே, மேலும் பேய் தான் அவர்களைக் கொன்றுப் போட்டதாகவும் சொல்லுகிறார்களே.

¹⁵ அப்படி என்றால் எனக்கும் அவ்வாறே நிகழ்ந்து விடுமோ என்று அஞ்சுகிறேன். நானோ என் பெற்றோருக்கு ஒரே பிள்ளை. அப்படி இருக்க, நான் செத்தால் வயதான அவர்கள் என் மேலுள்ள ஏக்கத்தினால் உயிரை விடுவார்கள்" என்று மறுமொழி சொன்னான்.

¹⁶ இரபாயேல் என்ற தூதர் அவனுக்கு மறு மொழியாக, "நான் சொல்வதைக் கேள். பேயின் அதிகாரத்துக்கு உட்பட்டவர்கள் யார் யார் என்று உனக்குக் காண்பிப்பேன்.

¹⁷ தங்களிடமிருந்தும் தங்கள் எண்ணத்தினின்றும் கடவுளைக் தள்ளிவிட்டு, அறிவற்ற குதிரையையும் கோவேறு கழுதையையும் போல் தமது காம இச்சையை நிறைவேற்றுவதற்காகத் திருமணம் செய்து கொள்பவர்கள் மேல் மட்டுமே பேய்க்கு வல்லமை உண்டு.

¹⁸ நீயோ அவளை ஏற்றுக் கொண்டபின் மணவறையில் நுழைந்து மூன்று நாள் வரை அவளோடு தொடர்பு கொள்ளாது அவளோடு சேர்ந்து செபம் மட்டும் செய்.

¹⁹ அன்றிரவு நீ மீனின் ஈரலைப் புகைக்கவே பேய் ஓடிப் போகும்.

²⁰ இரண்டாம் இரவு புனித குலத் தந்தையார் கூட்டத்தில் நீயும் ஏற்றுக் கொள்ளப் பெறுவாய்.

²¹ மூன்றாம் இரவு உங்களுக்கு நல்ல மகப்பேறு கிடைக்கும் பொருட்டு நீ இறை ஆசீரை அடைந்திடுவாய்.

²² மூன்றாம் இரவு கழிந்த பின், ஆபிரகாம் சந்ததியில் மகப்பேற்றைப் பெறக் கருதி, மோக இச்சையை நிறைவேற்றுவது பற்றி அத்துணை நினையாது, மகப்பேற்றையே தலையானதாய் விரும்பித் தெய்வ பயத்தோடு அக்கன்னிப் பெண்ணுடன் உறவு கொள்" என்றார்.