தொபியாசு ஆகமம் - பழைய ஏற்பாடு

¹ தொபியாசு தாம் சாகும்படி செய்து கொண்ட விண்ணப்பம் கேட்டருளப்படும் என்று நம்பி, தம் மகன் தோபியை அருகே அழைத்தார்.

² அவனை நோக்கி, "மகனே, என் வாய்மொழிகளைக் கேட்டு அவற்றை உன் இதயத்தின் ஆழத்தில் பதிய வை.

³ கடவுள் என் உயிரை எடுத்துக் கொண்ட பின் என் உடலை அடக்கம் செய். உன் தாயின் வாழ்நாள் முழுவதும் அவளை மதித்துப் போற்று.

⁴ அவளது வயிற்றில் நீ இருக்கும் போது உன் பொருட்டு அவள் எத்தனை துன்ப துயரங்களை அனுபவித்தாள் என்பதை நீ நினைவில் கொள்ள வேண்டும்.

⁵ அவளும் உயிர் நீத்தப்பின் என் அருகிலேயே அவளை அடக்கம் செய்.

⁶ உன் வாழ்நாள் எல்லாம் கடவுளை உன் எண்ணத்தில் கொண்டிரு. ஒருகாலும் பாவத்துக்கு இணங்காதபடியும், நம் கடவுளாகிய ஆண்டவரின் கட்டளைகளை மீறாதபடியும் எச்சரிக்கையாய் இரு.

⁷ உன் உடைமையிலிருந்து தானம் செய். எந்த ஏழையைக் கண்டாலும் புறக்கணியாது அவனுக்குப் பரிவு காட்டு. அவ்வாறு செய்தால் கடவுளும் உன்னைப் புறக்கணியாமல் உனக்குப் பரிவு காட்டுவார்.

⁸ உன் நிலைமைக்கு ஏற்ப பிறர் மேல் இரக்கம் காட்டு.

⁹ உனக்கு மிகுதியான செல்வம் இருக்கும் போது ஏராளமாய்க் கொடு@ குறைந்த செல்வம் இருக்கும் போது கொஞ்சமாய், ஆனால் நன்மனத்தோடு கொடுக்கும்படி கவனித்துக்கொள்.

¹⁰ இவ்வாறு நீ செய்தால், தேவைப்படும் நாளில் அதுவே உனக்குப் பேருதவியாய் இருக்கும்.

¹¹ ஏனெனில் ஈகை எல்லாப் பாவங்களினின்றும் சாவினின்றும் ஒருவனை மீட்கிறது. அத்தோடு ஆன்மாவை இருளினின்று விடுவிக்கிறது.

¹² தானம் கொடுப்போர் அனைவர்க்கும் அவர்களின் ஈகை உன்னத கடவுளின் திருமுன் ஆழ்ந்த நம்பிக்கையைத் தரும்.

¹³ எவ்வித விபசாரத்திற்கும், மகனே, இடம் கொடாதே. உன் மனைவியைத் தவிர வேறெந்தப் பெண்ணோடும் உறவு வைத்துக் கொள்வதன் மூலம் பாவம் புரிய இணங்காதே.

¹⁴ உன் சிந்தையிலாவது சொல்லிலாவது எப்போதேனும் ஆணவம் தலைகாட்ட விடாதே. ஏனெனில் எல்லாக் கேடுகளுக்கும் அடிப்படை ஆணவமே.

¹⁵ எவனாவது உனக்கு ஏதேனும் ஒரு வேலை செய்திருந்தால், உடனே அவனுக்குக் கூலி கொடுக்கவேண்டும். வேலைக்காரரது கூலி ஒருபோதும் உன்னிடம் இருக்கலாகாது.

¹⁶ அயலான் உனக்கு வருத்தமுண்டாகும்படி செய்த எதையும் நீ மற்றவனுக்கு ஒருபோதும் செய்யாதபடி பார்த்துக்கொள்.

¹⁷ பசித்தவர்களுக்கும் ஏழைகளுக்கும் உன் உணவைப் பங்கிட்டு உண்பதும், உடையற்றவர்களை உன் சொந்த ஆடைகளால் உடுத்துவதும் நல்லது.

¹⁸ உன் அப்பத்தையும் இரசத்தையும் நீதிமானின் கல்லறையில் வைத்துப் பரிமாறு@

¹⁹ பாவிகளோடு கூடி உண்ணாதே. ஞானியிடம் எப்போதும் ஆலோசனை கேள்.

²⁰ எக்காலத்தும் கடவுளை ஏத்திப் போற்று. அவர் உன்னை வழி நடத்தும்படியும், உன் ஆலோசனைகள் எல்லாம் அவரிடத்தில் நிலைகொள்ளும்படியும் அவரை மன்றாடு

²¹ மகனே, நான் இன்னுமொரு செய்தியை உன்னிடம் கூறவேண்டும். அதாவது: நீ சிறுவனாய் இருந்த போது, கபேலுசு என்பவனுக்கு நான் பத்துத் தாலந்து வெள்ளி கடன் கொடுத்தேன். அவன் மேதியர்களின் நகரான இராஜேசில் குடியிருக்கிறான்.

²² அந்த கடன் பத்திரம் என்னிடம் இருக்கிறது. ஆகவே நீ அவனிடம் சென்று மேற்சொன்ன தொகையை அவனிடமிருந்து பெற்றுக்கொண்டு, அவன் கொடுத்த சீட்டை அவனுக்கு,த திரும்பிக் கொடுத்துவிடும்படி ஆவன செய்.

²³ அஞ்சாதே மகனே| நாம் ஏழ்மையில் வாழ்வது உண்மையே. ஆயினும், நாம் கடவுளுக்கு அஞ்சி, எவ்விதப் பாவத்தையும் விட்டு விலகி நன்மை செய்து வருவோமானால், ஏராளமான நன்மைகள் நம்மை வந்தடையும்" என்று கூறினார்.