சீராக் ஆகமம் - பழைய ஏற்பாடு

¹ ஆண்டவராகிய அரசரே, உமக்கு நன்றியறிந்த வணக்கம் செய்கிறேன். என் மீட்பராகிய கடவுளே, உம்மைத் துதிக்கிறேன்.

² உமது பெயருக்கு வணக்கம் செலுத்துகிறேன். ஏனென்றால், நீர் எனக்குத் துணைவரும் பாதுகாவலரும் ஆனீர்.

³ அழிவினின்றும், அக்கிரம நாவின் வலையினின்றும், பொய்யருடைய உதடுகளினின்றும் என் உடலைக் காப்பாற்றினீர். என்னைச் சுற்றிலும் இருக்கிறவர்களுக்கு முன்பாக எனக்குத் துணைவர் ஆனீர்.

⁴ உமது பெயரின் இரக்கப் பெருக்கத்திற்குத் தகுந்த வண்ணம், என்னை விழுங்க நினைப்பவர்களிடமிருந்து என்னைக் காப்பாற்றினீர்.

⁵ என் ஆன்மாவைத் தேடுகிறவர்களுடைய கைகளினின்றும், என்னைச் சுற்றிக் கொண்ட துன்பங்களின் வாயில்களினின்றும்,

⁶ என்னைச் சூழ்ந்து கொண்ட நெருப்பின் நெருக்குதலினின்றும் என்னைக் காப்பாற்றினீர்@ நானும் நெருப்பில் வெந்து போகவில்லை.

⁷ நரகக் குழியின் பாதாளத்தினின்றும், அருவருப்பான நாவினின்றும், பொய்யான வார்த்தையினின்றும், அக்கிரம அரசனினின்றும், அநியாய நாவினின்றும் என்னைக் காப்பாற்றினீர்.

⁸ மரணமட்டும் என் ஆன்மா ஆண்டவரைத் துதிக்கும்.

⁹ என் உயிர் பாதாளத்தின் அண்மையில் இருந்தது.

¹⁰ நரக வேதனைகள் நாலா பக்கத்திலும் என்னைச் சூழ்ந்து கொண்டிருந்தன. எனக்கு உதவி செய்வார் ஒருவரும் இல்லை. நான் மனிதரிடத்தில் உதவி தேடினேன்.

¹¹ ஒருவரும் உதவவில்லை. ஆண்டவரே, உமது இரக்கத்தையும், தொடக்க முதல் நீர் செய்தவைகளையும் நினைத்துக் கொண்டேன்.

¹² ஆண்டவரே, உம் கட்டளைகளைக் கடைப்பிடிக்கிறவர்களை நீர் விடுவிக்கிறீர்@ அவர்களை மக்களுடைய கைகளினின்று காப்பாற்றுகிறீர்.

¹³ என் உறைவிடத்தைப் பூமியில் உயர்த்தினீர். வரவிருக்கும் சாவினின்று காப்பாற்ற உம்மை மன்றாடினேன்.

¹⁴ என் ஆபத்து நாளில் என்னைக் கைவிடாதபடிக்கும், செருக்குற்றோருடைய காலத்தில் என்னைத் துணைவரில்லாமல் விடாதபடிக்கும் என் ஆண்டவருடைய தந்தையாகிய கடவுளை மன்றாடினேன்.

¹⁵ நான் இடைவிடாமல் உமது பெயரைத் துதிப்பேன்@ என் நன்றியறிதலோடு அதை வாழ்த்துவேன். என் வேண்டுதல் கேட்கப்பட்டது.

¹⁶ அழிவினின்று என்னைக் காப்பாற்றினீர், அக்கிரம காலத்தினின்று என்னை விடுவித்தீர்.

¹⁷ ஆகையால் உமக்கு நன்றியறிந்த புகழ்ச்சி கூறுவேன். ஆண்டவருடைய பெயரைத் துதிப்பேன்.

¹⁸ நான் இளைஞனாய் இருந்த போதே, தவறிப் போவதற்கு முந்தியே, என் செபத்தில் வெளிப்படையாய் ஞானத்தைத் தேடினேன்.

¹⁹ கடவுள் ஆலயத்திற்கு முன்பாக அதற்காக மன்றாடினேன். இறுதிவரை அதைப் பின்பற்றுவேன். காலத்திற்கு முன் பழுக்கும் கொடிமுந்திரிப் பழத்தைப் போல் அது என்னிடம் வளமுற்றது.

²⁰ என் இதயம் அதன்பால் மகிழ்ச்சி கொண்டது. என் பாதம் செவ்வழி நடந்தது. என் இளமை முதல் நான் அதை ஆராய்ந்தேன்.

²¹ தாழ்மையாய் என் செவியைச் செலுத்தினேன்.

²² அதை அடைந்தேன். என்னிடம் மிகுந்த ஞானத்தைக் கண்டேன். அதில் மிகவும் விருத்தி அடைந்தேன்.

²³ எனக்கு ஞானம் கொடுக்கிறவரை மகிமைப்படுத்துவேன்.

²⁴ அதைச் செய்வதற்குத் தீர்மானம் செய்து கொண்டேன். நன்மை செய்வதில் பெரும் முயற்சியெடுத்தேன். நான் கலக்கம் அடைய மாட்டேன்.

²⁵ என் ஆன்மா அதில் போராடினது. அதைச் செய்வதில் நான் உறுதிப்படுத்தப்பட்டேன்.

²⁶ என் கைகளை உயர்த்தினேன். அவற்றின் மூடத்தனத்தைப்பற்றிப் புலம்பினேன்.

²⁷ ஞானத்தை நோக்கி என் ஆன்மாவை நடத்தினேன். அறிவில் அதைக் கண்டேன்.

²⁸ தொடக்கத்திலேயே அதனுடன் என் இதயத்தை ஒன்றித்தேன். ஆதலால், நான் கைவிடப்பட மாட்டேன்.

²⁹ அதைத் தேடுவதில் என் உள்ளம் கலங்கினது. ஆதலால் மேலான நன்மையைக் கைக்கொள்வேன்.

³⁰ வெகுமதியாக ஆண்டவர் எனக்கு நாவைக் கொடுத்தார். அதைக்கொண்டு அவரைப் போற்றுவேன்.

³¹ படிக்காதவர்களே, என்னிடம் அணுகி வாருங்கள். நன்னெறியின் வீட்டில் வந்து கேளுங்கள்.

³² ஏன் இன்னும் தாமதிக்கிறீர்கள்? இதற்கு என்ன சொல்கிறீர்கள்? உங்கள் ஆன்மாக்கள் வெகு தாகமாய் இருக்கின்றன. என் வாயைத் திறந்து பேசினேன்.

³³ பணமில்லாமல் அதை அடைந்து கொள்ளுங்கள்.

³⁴ உங்கள் கழுத்தை நுகத்தடிக்குக் கீழ்ப்படுத்துங்கள். உங்கள் ஆன்மா நன்னெறியை ஏற்றுக் கொள்ளக் கடவது. ஏனென்றால், அதைச் சீக்கிரம் கண்டடையலாம்.

³⁵ உங்கள் கண்களால் பாருங்கள். ஏனென்றால், நான் சொற்ப முயற்சி செய்தேன்@ ஆனால், வெகு இளைப்பாற்றியைக் கண்டேன்.

³⁶ மிகுந்த பணத்தொகை போல நன்னெறியைப் பெற்றுக் கொள்ளுங்கள். திரளான பொன்னைப் போல அதை வைத்திருங்கள்.

³⁷ ஆண்டவருடைய இரக்கத்தில் உங்கள் ஆன்மா மகிழ்ச்சியடையக்கடவது. அவருடைய புகழ்ச்சியில் கலக்கம் அடைய மாட்டீர்கள்.

³⁸ காலத்திற்கு முந்தியே உங்கள் வேலையை நடத்துங்கள். காலம் வரும் போது அவர் உங்களுக்கு வெகுமதி அளிப்பார்.