2 மக்கபே ஆகமம் - பழைய ஏற்பாடு

¹ நூற்று நாற்பத்தொன்பதாம் ஆண்டு அந்தியோக்கஸ் எயுபாத்தோர் பெரும் படையோடு யூதோவுக்கு எதிராய் வருவதாகவும்,

² அவனுடன் அவன் அமைச்சனும் செயலனுமான லிசியாஸ் இலட்சத்துப் பதினாயிரம் காலாட்களோடும், ஐயாயிரம் குதிரை வீரரோடும், இருபத்திரண்டு யானைகளோடும், வீச்சு வாள்கள் நிறைந்த முந்நூறு தேர்களோடும் வருவதாகவும் யூதாஸ் கேள்விப்பட்டார்.

³ அவர்களுடன் மெனேலாவுசும் சேர்ந்து கொண்டான்@ தன் நாட்டின் நலனை முன்னிட்டன்று, ஆனால், தான் தலைவனாக்கப்படலாம் என்ற நம்பிக்கையினாலேயே கபடமாய் அந்தியோக்கசை மன்றாடினான்.

⁴ ஆனால், அரசர்க்கரசர் அந்தப் பாவியின் மீது அந்தியோக்கசின் கோபத்தைத் தூண்டி விட்டார். லிசியாசும் இவனே எல்லாத் தீமைகளுக்கும் காரணமென்று அரசனிடம் சொல்ல, அவன் அவ்விடத்து வழக்கம் போல் அவனைப் பிடித்து அவ்விடத்திலேயே கொலை செய்யக் கட்டளையிட்டான்.

⁵ அவ்விடத்தில் சாம்பல் குவியல்களால் சூழப்பட்ட ஐம்பது முழ உயரமுள்ள ஒரு கோபுரமும் உண்டு. அதைச் சுற்றிலும் பள்ளமாக இருந்தது.

⁶ கடவுளைப் பழித்த மெனேலாவுசை அவ்விடத்தினின்று சாம்பலில் தள்ளி விடும்படி அரசன் கட்டளையிட்டான். எல்லாருமே சேர்ந்து அவனைச் சாவுக்குத் தள்ளி விட்டார்கள்,

⁷ (கடவுள்) கட்டளையை மீறியவன் இத்தகைய கட்டளையால் சாகும்படி நேரிட்டது. மெனேலாவுஸ் அடக்கம் செய்யப் படவில்லை.

⁸ இது முற்றிலும் முறையே. ஏனென்றால் புனித நெருப்பும் புனித சாம்பலும் இருக்கும் கடவுளுடைய பீடத்திற்கு எதிராகப் பல பாவங்களைக் கட்டிக்கொண்ட அவன் சாம்பல் மரணத்துக்கே தீர்ப்பிடப்பட்டான்.

⁹ ஆயினும், அரசன் தன் தந்தையை விடக் கொடுமையுள்ளவனாகத் தன்னை யூதருக்குக் காண்பிக்க, தன் மனத்தில் கோபங்கொண்டு வந்தான்.

¹⁰ இதை அறிந்த யூதாஸ், எப்போதும் போல் இப்போதும் தங்களுக்கு உதவி புரிய ஆண்டவரை இரவும் பகலும் மன்றாட மக்களுக்குக் கட்டளையிட்டார்.

¹¹ கட்டளையும் நாடும் கடவுள் ஆலயமும் தங்களிடமிருந்து எடுபட்டுப் போகுமென்று அவர்கள் அஞ்சினார்கள். சிறிது காலம் சமாதானத்தில் வாழ்ந்த மக்கள் திரும்பவும் கடவுளைப் பழிக்கும் நாட்டவர்களுக்கு அடிமைகளாகுமாறு விடாதபடி, மன்றாடக் கட்டளையிட்டார்.

¹² எல்லாரும் அவ்வாறே செய்து, மூன்று நாள் வரையிலும் இடைவிடாமல் நெடுங்கிடையாக விழுந்து, அழுகையிலும் நோன்பிலும் ஆண்டவருடைய இரக்கத்தை மன்றாடின பிறகு, போருக்குக் தயாராகும்படி யூதாஸ் அவர்களைத் தூண்டினார்.

¹³ அவர் மூத்தோரோடு கலந்து, அரசன் யூதேயா நாட்டிற்குள் தன் படைகளை நடத்தி நகரைப் பிடித்துக் கொள்வதற்கு முன்பே, தாமே புறப்பட்டுப் போகவும், முடிவை ஆண்டவரின் தீர்ப்பிற்கு விட்டு விடவும் தீர்மானித்தார்.

¹⁴ ஆகையால் உலகத்தை உருவாக்கிய கடவுளிடம் அனைத்தையும் ஒப்படைத்து, தம்முடன் இருந்தவர்கள் துணிவுடன் போர் புரிந்து, சாகுமட்டும் தங்கள் கட்டளைக்கும் கடவுளின் ஆலயத்துக்கும் நகரத்துக்கும் நாட்டிற்கும் நகரத்தாருக்கும் உறுதியாக நிற்க வேண்டுமென்று திடஞ் சொல்லி, மோதின் நகருக்கு அருகில் பாளையம் இறங்கினார்.

¹⁵ வெற்றியின் கடவுள் என்ற அடையாளத்தைத் தம் மக்களுக்குக் கொடுத்து, வீரமிக்க இளைஞரைத் தேர்ந்தெடுத்துக் கொண்டு, இரவில் அரசனின் கூடாரத்தைத் தாக்கி, பாளையத்தில் நாலாயிரம் பேர்களையும் யானைகளில் பெரிதானவற்றையும் அதன்மேல் இருந்தவர்களையும் கொன்றார்.

¹⁶ மிக்க பயத்தையும் கலக்கத்தையும் பாளையத்தில் உண்டாக்கித் தாங்கள் விரும்பியபடி நிறைவேற்றி விட்டுப் போய் விட்டார்கள்.

¹⁷ இது ஆண்டவரின் உதவியால் பொழுது விடியும் போது நடந்தது.

¹⁸ ஆனால், அரசன் யூதருடைய துணிவைக் கண்டு கொண்டமையால், தந்திரத்தால் வலிமை மிக்க அரண்களைப் பிடிக்க முயன்றான்.

¹⁹ யூதருடைய வலிமை பொருந்திய கோட்டையாகிய பெத்சூராவைத் தாக்கிப் படையெடுத்துப் போனான். ஆனால், துரத்தியடிக்கப்பட்டான்@ பெரும் சேதத்தோடு தோல்வியடைந்தான்.

²⁰ நகருக்குள் இருந்தவர்களுக்குத் தேவையான பொருட்களை யூதாஸ் அனுப்பினார்.

²¹ யூதர் படையிலிருந்த ரோதோக்கஸ் என்னும் ஒருவன் பகைவர்களுக்கு இரகசியங்களை அறிவித்தான். அவன் விசாரிக்கப்பட்ட பிறகு பிடித்து அடைக்கப்பட்டான்.

²² திரும்பவும் அரசன் பெத்சூராவில் இருந்தவர்களுடன் கலந்து பேசி, உடன்படிக்கை செய்து கொடுத்தான்@ அவர்களுடைய உடன்படிக்கையை ஒப்புக்கொண்டான்@ திரும்பிப் போனான்.

²³ அவன் யூதாசோடும் போர்புரிந்து தோல்வியடைந்தான்@ அந்தியோக்கியாவில் காரியங்களைக் கவனிக்க தான் விட்டுவந்த பிலிப்பு என்பவன் கலகம் செய்வதாகக் கேள்விப்பட்டு, மனத்தில் கலக்கமுற்று யூதர்களை மன்றாடி, அவர்களுக்குத் தன்னைத் தாழ்த்தி, நீதியாய்த் தோன்றுவன எல்லாவற்றிற்கும் தான் இணங்குவதாக ஆணையிட்டுக் கூறினான்@ சமாதானமாகிப் பலி ஒப்புக்கொடுத்தான்@ கடவுள் ஆலயத்தை மகிமைப்படுத்தினான்@ காணிக்கைகளும் கொடுத்தான்.

²⁴ மக்கபேயுசைத் தழுவிக் கொண்டான். தோலெமாயிதா முதல் ஜெர்ரேனா நாடு வரையிலும் அவரைப் படைத்தலைவராகவும் ஆளுநராகவும் ஏற்படுத்தினான்.

²⁵ அவன் தோலெமாயிதாவுக்கு வந்த போது, தோலெமேயர் அச்சமாதான உடன்படிக்கையை விருப்பத்தோடு ஏற்றுக் கொள்ளவில்லை@ ஏனென்றால், சிலவேளை உடன்படிக்கை மீறப்படுமென்று கோபம் கொண்டார்கள்.

²⁶ அப்போது லிசியாஸ் மேடையின் மேல் ஏறி நியாயத்தை விளக்கி மக்களை அமர்த்தினான்@ பின் அந்தியோக்கியா திரும்பினான். அரசனுடைய படையெடுப்பும் திரும்புதலும் இவ்வாறு முடிவு பெற்றன.