யூதித் ஆகமம் - பழைய ஏற்பாடு

¹ இஸ்ராயேல் மக்கள் தன்னோடு போராட முயற்சி செய்கிறதாகவும், மலைப்பாதைகளை அடைத்து விட்டதாகவும் அசீரியப் படைத் தலைவனான ஒலொபெர்னெஸ் கேள்விப்பட்டான்.

² எனவே அவன் கடும் கோபமுற்றுக் கொதித்தெழுந்தான்@ மோவாபின் மக்கள் தலைவர்களையும், அம்மோனியப் படைத்தலைவர்களையும் தன்னிடம் வரவழைத்தான்,

³ அவர்களை நோக்கி, "மலைகளைக் கைப்பற்றிக் கொண்டிருக்கிற அந்த மக்கள் யார்? அவர்களின் நகர்கள் எவை? எப்படிப்பட்டவை? எத்துனைப் பெரியவை? அவர்களது படைப்பலம் யாது? அவர்கள் எத்தனை பேர்? அவர்களது படையை நடத்தி வரும் அரசன் யார்?

⁴ கீழ்நாட்டவர் அனைவரிலும் இவர்கள் மட்டும் எங்களை வெறுப்பது ஏன்? எங்களைச் சமாதானமாய் வரவேற்கும் பொருட்டு எங்களைச் சந்திக்க வராததன் காரணம் என்ன?" என்று கேட்டான்.

⁵ அப்பொழுது அம்மோனியர் அனைவருக்கும் தலைவனான ஆக்கியோர் அவனை நோக்கி, "தலைவா நீர் எனக்குச் செவிமடுக்க மனம் கொண்டால் மலைவாசிகளான இம்மக்கள் யார் என்று உமக்கு முன்பாக உண்மையைச் சொல்வேன்.

⁶ நான் சொல்வது பொய் இல்லை. இம் மக்கள் கல்தேயர் வழிவந்தோர் ஆவர்.

⁷ அவர்கள் கல்தேயா நாட்டிலிருந்த தங்கள் முன்னோர்களின் தெய்வங்களை வழிபட மனமில்லாததால் முதன் முதல் மெசொபோத்தேமியாவில் குடியேறினர்.

⁸ இவ்வாறு பற்பல தெய்வங்களை வழிபட்டு வந்த அவர்கள் தங்கள் முன்னோரின் வழிமுறைகளை விட்டு விட்டு, விண்ணகக் கடவுளான ஒரே ஆண்டவரை வழிபட்டனர்.

⁹ அவரோ அவர்களை அங்கிருந்து புறப்பட்டுக் கானான் நாட்டில் குடியேறக் கட்டளையிட்டார். பிறகு நாடெங்கும் பஞ்சம் ஏற்பட்டது. எனவே அவர்கள் எகிப்துக்குச் சென்று அங்கு நானூறு ஆண்டுகள் தங்கியிருந்தனர். அதற்குள் அவர்கள் எண்ணமுடியாத அளவுக்குப் பெருகிவிட்டனர்.

¹⁰ எகிப்திய அரசன் அவர்களை வாட்டி வதைத்துச் செங்கல், சுண்ணாம்பைக் கொண்டு தன் நகர்களைக் கட்டக் கட்டாயப்படுத்தினான். ஆதலால் அவர்கள் தங்கள் ஆண்டவரை நோக்கிக் கதறி அழுதனர். எனவே அவர் பற்பல கொள்ளை நோய்களால் எகிப்து நாட்டை வதைத்தார்.

¹¹ எகிப்தியர் தங்கள் நாட்டிலிருந்து அவர்களை வெளியேற்றின பின், அந்தக் கொள்ளை நோய்கள் அவர்களை விட்டு நீங்கின. அதைக்கண்ட எகிப்தியர் மீண்டும் அவர்களைப் பிடித்துத் தங்களுக்குக் கீழ்ப்படுத்த விரும்பினர்.

¹² ஆனால் தப்பிச்சென்ற அவர்களுக்கு முன்பாக விண்ணகக் கடவுள் கடலை இரண்டாகப் பிரித்தார். உடனே இருமருங்கிலும் தண்ணீர் பலத்த சுவரைப் போல் நின்றது. அவர்களும் கால் நனையாமல் கடலைக் கடந்து சென்றார்கள்.

¹³ எண்ணற்ற எகிப்தியப் படைவீரர்கள் அவ்வழியே அவர்களைப் பின்தொடர்ந்தனர். அப்பொழுது தண்ணீர் திரும்பவும் ஒன்று திரண்டு எகிப்தியரை மூடிற்று. நடந்தது பற்றித் தம் சந்ததியாருக்குச் சொல்லும்படி அவர்களில் ஒருவன் கூட உயிர் தப்பவில்லை.

¹⁴ இஸ்ராயேலரோ செங்கடலைக் கடந்து அதுவரை மனிதர் வாழ இயலாததும், மனிதன் எவனும் வாழ்ந்திராததுமான சீனாய் மலைப் பாலைவனத்தில் குடியேறினர்.

¹⁵ அவ்விடத்துக் கசப்பான நீர் ஊற்றுகள் அவர்கள் குடிக்கத் தக்க இனிய நீரைச் சுரந்தன. மேலும் வானினின்று நாற்பது ஆண்டுகளாய் உணவு அவர்களுக்கு அளிக்கப்பட்டது.

¹⁶ வில், வேல், கேடயம், வாள் முதலியன இன்றி அவர்கள் சென்றவிடமெல்லாம் அவர்களுடைய கடவுளே அவர்களோடு இருந்து எதிரிகளைத் தோற்கடித்தார்.

¹⁷ அவர்கள் தங்கள் ஆண்டவரான கடவுளை வழிபடாத நாட்களைத் தவிர, மற்ற நாட்களில் யாரும் அவர்களைத் தோற்கடித்தது கிடையாது.

¹⁸ எவ்வெப்போது அவர்கள் தங்கள் கடவுளை விட்டு அந்நிய தெய்வங்களை வழிபட்டார்களோ, அவ்வப்போதெல்லாம் அவர்கள் கொள்ளைக்கும் வாளுக்கும் நிந்தைக்கும் உள்ளானார்கள்.

¹⁹ ஆனால் அவர்கள் எத்தனை முறை தங்கள் கடவுளின் வழிப்பாட்டைத் தவிர்த்ததற்காக மனம் வருந்தினார்களோ, அத்தனை முறையும் விண்ணகக் கடவுள் அவர்களுடைய எதிரிகளை எதிர்த்து நிற்கும் ஆற்றலை அவர்களுக்குக் கொடுத்தார்.

²⁰ இவ்வாறு அவர்கள் கானானியர், யெபுசையர், பெரேசையர், ஏத்தையர், ஏவையர், அமோறையர் முதலியோரின் அரசர்களையும் ஏசேபோனின் எல்லா வலியோரையும் வென்று அவர்கள் நாடுகளையும் நகர்களையும் கைப்பற்றி வந்தனர்.

²¹ அவர்கள் தங்கள் கடவுளுக்கு எதிராகப் பாவம் செய்யாத வரையில் அவர்களுக்கு எல்லாம் நன்மையாகவே முடிந்தது@ ஏனெனில் அவர்களுடைய கடவுள் பாவத்தை வெறுக்கிறார்.

²² உண்மையிலேயே சில ஆண்டுகளுக்கு முன், அவர்கள் நடந்தொழுக வேண்டுமென்று கடவுள் அவர்களுக்குக் கட்டளையிட்டிருந்த நெறியை விட்டு விலகினதால், அவர்கள் பல நாட்டவரால் போரில் கொல்லப்பட்டனர். அவர்களில் பெரும்பாலோர் சிறைப்படுத்தப்பட்டு அந்நிய நாட்டுக்குக் கொண்டு போகப்பட்டனர்.

²³ சிறிது காலத்திற்குப் பின் அவர்கள் தங்கள் ஆண்டவரான கடவுளின் பக்கம் மனந்திரும்பவே அவர்கள் சிதறிக் கிடந்த நாட்டிலிருந்து வந்து மீண்டும் ஒன்று சேர்ந்து இம்மலைப்புறமெங்கும் குடியேறித் தங்கள் கடவுளின் ஆலயம் அமைந்திருந்த யெருசலேமை மறுபடியும் சொந்தமாக்கிக் கொண்டனர்.

²⁴ இச் சூழ்நிலையில், என் தலைவ, அவர்கள் தங்கள் கடவுளுக்கு எதிராக ஏதாவது பாவம் செய்ததுண்டா என்று விசாரித்துப் பாரும்@ அப்படிச் செய்திருந்தால் இப்போதே நாம் அவர்கள்மீது படையெடுக்கலாம். அவர்களின் கடவுளும் அவர்களை நமது கையில் ஒப்புவிப்பார். இவ்வாறு அவர்கள் உமக்கு அடிமைகள் ஆவார்கள்.

²⁵ அவர்கள் தங்கள் கடவுளுக்கு எதிராக யாதொரு பாவமும் செய்யாதிருப்பின், அவர்களை எதிர்த்து நிற்க நம்மால் இயலாது. ஏனெனில் அவர்களுடைய கடவுளே அவர்களைப் பாதுகாப்பார். அதனால் நாம் பூமி எங்கனும் இகழப்படுவோம்" என்றான்.

²⁶ ஆக்கியோர் இதைச் சொல்லி முடிக்கவே, ஒலொபெர்னெசுடைய படையின் மேல் அதிகாரிகள் அனைவரும் சினம் கொண்டு அவனைக் கொல்ல எண்ணினர்.

²⁷ ஒருவர் ஒருவரைப் பார்த்து, "ஆயுதமற்றவரும் ஆற்றலற்றவரும் போரிடுவதில் தேர்ச்சியற்றவருமான இஸ்ராயேல் மக்கள் நபுக்கோதனசார் அரசையும், அவரது படையையும் எதிர்த்து நிற்க முடியும் என்று சொல்ல இவன் யார்?

²⁸ ஆக்கியோர் சொன்னது பொய் என்று அவனே அறிந்து கொள்ளும்படி நாம் இப்போதே மலைகள் மீது படையெடுத்துச் செல்வோம். அவர்களுள் வலியோரைச் சிறைப்பிடித்த பின், அவர்களோடு இவனையும் வாளுக்கு இரையாக்குவோம்.

²⁹ இதன் மூலம் நபுக்கோதனசார் ஒருவரைத் தவிர மண்ணில் வேறு கடவுள் இல்லை என்று எல்லா மக்களும் அறிந்துகொள்வர்" என்று கத்தினார்கள்.