எஸ்தர் ஆகமம் - பழைய ஏற்பாடு

¹ இந்தியா தொடங்கி எத்தியோப்பியா வரை ஆட்சி செலுத்தி வரும் பேரரசராகிய அர்தக்சேர்செஸ் தமது ஆட்சிக்கு உட்பட்ட நூற்றிருபத்தேழு நாடுகளின் சிற்றரசர்களுக்கும் ஆளுநர்களுக்கும் வாழ்த்துக் கூறி வரைவதாவது:

² நாம் பல நாடுகளை அடிமைப்படுத்தி உலகம் முழுவதையும் நமது ஆட்சிக்குக் கீழ்க் கொணர்ந்திருந்தும், நமது அதிகாரத்தை ஒருகாலும் தீய வழியில் செலவிட விரும்பவில்லை. மாறாக நம் குடிகளைத் தயவோடும் கருணையோடும் ஆண்டு, அவர்கள் யாதோர் அச்சமுமின்றி அமைதியாய் உயிர்வாழவும், எல்லா மனிதரும் விரும்பும் அமைதியை அவர்களும் பெற்று மகிழவும் வேண்டும் என்று விரும்பினோம்.

³ அதற்கான வழிமுறைகளைப் பற்றி நம் அமைச்சர்களைக் கலந்து ஆலோசித்தோம். அப்பொழுது அறிவிலும் நேர்மையிலும் மற்றவர்களுக்கு மேற்பட்டவனும் அரசருக்கு அடுத்த நிலையில் இருந்தவனுமான ஒருவன் இருந்தான்@ அவனுக்கு ஆமான் என்று பெயர்.

⁴ புதுப்புதுச் சட்டங்களைப் பின்பற்றி மற்ற மக்களின் பழக்க வழக்கங்களுக்கு மாறாக நடந்து, அரசர்களின் கட்டளைகளையும் மீறி, மற்றெல்லா மக்களுடையவும் ஒற்றுமையைத் தங்கள் ஒவ்வாமையினால் குலைத்து வரும் ஓர் இனத்தார் உலகெங்கும் சிதறி வாழ்ந்து வருவதாக அவன் நமக்குத் தெரிவித்தான்.

⁵ மனித இனம் அனைத்திற்கும் ஒவ்வாத சட்ட திட்டங்களைப் பின்பற்றி, நம் கட்டளைகளை மீறி, நமது ஆளுகைக்கு உட்பட்ட மாநிலங்களின் ஒற்றுமையைக் குலைத்து வரும் அவ்வினத்தாரைப் பற்றிக் கேள்விப்பட்ட நாம்,

⁶ எல்லா நாடுகளுக்கும் தலைவரும் அரசருமாகிய நமக்கு அடுத்த நிலையில் உள்ளவனும் தந்தையைப் போல் நாம் மதித்து வருபவனுமான ஆமானால் குறிப்பிடப்பட்ட அனைவரும், இவ்வாண்டு ஆதார் என்னும் பன்னிரண்டாம் மாதம் பதினான்காம் நாளன்று தங்கள் மனைவி மக்களோடு தங்கள் பகைவர்களால் அடியோடு அழிக்கப்படுவர் என்றும், ஒருவனும் அவர்களுக்கு இரக்கம் காட்டக்கூடாது என்றும் கட்டளையிட்டோம்.

⁷ நம் கருத்து என்னவென்றால், மேற்சொல்லப்பட்ட தீய மனிதர் செத்து ஒரே நாளில் பாதாளத்திலே விழுந்தால், அவர்களாலே நாட்டில் உண்டான கலகம் நீங்கி அமைதி நிலவும் என்பதாம்."

⁸ மார்தொக்கேயோ ஆண்டவருடைய எல்லா (அற்புதச்) செயல்களையும் நினைவு கூர்ந்து, அவரை நோக்கி,

⁹ ஆண்டவரே, எல்லாம் வல்ல அரசராகிய ஆண்டவரே, எல்லாம் உமது ஆளுகைக்கு உட்பட்டுள்ளன. நீர் இஸ்ரையேலைக் காப்பாற்றத் திருவுளம் கொண்டால், அதை எதிர்த்து நிற்க எவராலும் இயலாது.

¹⁰ விண்ணையும் மண்ணையும், வானத்தின் கீழ் உள்ள அனைத்தையும் படைத்தவர் நீரே! நீரே அனைத்திற்கும் ஆண்டவர்.

¹¹ உமது மகிமையை எதிர்த்து நிற்பவன் யார்? நீர் அனைத்தையும் அறிவீர்.

¹² அகந்தை கொண்டவனாகிய ஆமானை நான் வணங்க மறுத்தது அகந்தையாலும் வெறுப்பினாலும் அல்ல, பெருமையின் பால் கொண்ட ஆசையினாலும் அல்ல என்றும் நீர் அறிவீர்.

¹³ ஏனெனில் இஸ்ராயேலின் மீட்பிற்காக அவன் அடிச்சுவட்டையும் மனப்பூர்வமாய் முத்தமிட நான் தயாராய் இருந்தேன்.

¹⁴ அவ்வாறு செய்தால் என் கடவுளுக்கே செல்ல வேண்டிய ஆராதனையை ஒரு மனிதனுக்குச் செலுத்தி விடுவேனோ என்று அஞ்சினேன். எனவே என் கடவுளையன்றி வேறெவனையும் ஆராதிக்க மாட்டேன் என்று தீர்மானித்தே அவ்விதமாய்ச் செய்தேன்.

¹⁵ எங்கள் பகைவர் எங்களைக் கொன்று விடவும், உமது உரிமையான மக்களை அழித்துவிடவும், விரும்புகின்றனர். எனவே ஆண்டவரே, ஆபிரகாமின் கடவுளாகிய என் அரசே, உம் மக்கள்மேல் கருணை கூர்ந்தருளும்.

¹⁶ எகிப்தினின்று நீர் மீட்டுக் கொணர்ந்த உமது பாகத்தைப் புறக்கணித்து விடாதேயும்.

¹⁷ என் மன்றாட்டைக் கேட்டு, உமது உரிமைச் சொத்தின் மேல் இரக்கம் வையும். ஆண்டவரே, நாங்கள் உயிர் வாழ்ந்து உமது திருப்பெயரைப் போற்றும்படி நீர் எங்கள் துக்கத்தை மகிழ்ச்சியாய் மாற்றியருளும். உம்மை வாழ்த்துகிற வாய்களை அடைந்து விடாதேயும்" என்று மன்றாடினார்.

¹⁸ இஸ்ராயேலர் அனைவரும் தங்களுக்குச் சாவு அண்மையில் இருந்தபடியால், அதே போன்று ஆண்டவரை நோக்கி வேண்டிக்கொண்டனர்.