குறுந்தொகை - 175. நெய்தல் - தலைவி கூற்று

பருவத் தேனசைஇப் பல்பறைத் தொழுதி உரவுத்திரை பொருத திணிமணல் அடைகரை நனைந்த புன்னை மாச்சினை தொகூஉம் மலர்ந்த பூவின் மாநீர்ச் சேர்ப்பற் கிரங்கேன் தோழியீங் கென்கொ லென்று	5
பிறர்பிறர் அறியக் கூறல் அமைந்தாங் கமைக அம்பல தெவனே.
- உலோச்சனார்.

தோழி! செவ்வியை யுடைய தேனை விரும்பி பல வண்டுக்கூட்டங்கள் உலாவுதலையுடைய அலைகள் மோதிய செறிந்தமணல் அடைந்த கரையின் கண் உள்ள அலைத் துவலையால் நனைந்த புன்னை மரத்தினது பெரிய கிளையின்கண் கூடுகின்ற மலர்ந்த மலர்களையும் கரிய நீரையுமுடைய கடற்கரைத் தலைவன்பொருட்டு வருந்தேன்; இவ்விடத்து இவள் ஏன் இங்ஙனம் ஆயினளென்று பிறர் பிறர் அறியும்படி கூறிதல் அவர்களுடைய மனம் அமைந்தபடி அமைக; அவர்கள் கூறும் அம்பல் என்ன துன்பத்தைச் செய்வதாகும்?

முடிபு: தோழி, சேர்ப்பற்கு இரங்கேன்; பிறர் கூறல் அமைக; அம்பல் எவன்?    

கருத்து: ஊரவர் கூறும் பழிமொழியை யான் அஞ்சேன்.