புலம்பெயர்ந்த நாடுகளில் தமிழ் நாடகக்கலை - நாடகக் கலைக் கட்டுரைகள்
வானொலி நாடகங்களின் இடர்பாடுகள் :
1. தரமான வானொலி நாடகப் பிரதிகளை உள்ளூர்ப் பின்னணியில் எழுதக்கூடிய வல்லவர்கள் குறைவாக இருப்பது.
2. வானொலி நாடகங்களைப் பின்னணி ஒலி அமைப்புகளுடன் பதிவுசெய்து கொள்ளக்கூடிய கலையகங்களும், உபகரணங்களும் தமிழ்க் கலைஞர்களுக்கு கிடைப்பது அரிது.
3. ஒத்திகைகளைப் பார்த்து, ஒலி அமைப்புகளைச் சேர்த்து நாடகங்களைத் தக்க முறையில் தயாரிக்கக் கலையக நேரமும், தொழில் நுட்ப வல்லுனரின் நேரமும் அதிகப் படியான செலவாக இருப்பது.
4. வானொலித் தயாரிப்புகளில் ஈடுபடுவோருக்கு எவ்வித சன்மானமும் வழங்கப்படாமையால் அவ்வகை ஆக்கங்களிலே கலைஞர்கள் ஆவலோடு பங்குகொள்ள முன்வராமை.
மேற்கண்ட இடர்பாடுகளை மேற்கொள்ள எதிர்காலத்தில் செய்யக் கூடியவை என்ன?
மேடை நாடகங்களிலும் சரி, வானொலி நாடகங்களிலும் சரி ஏகப்பட்ட இடர்ப்பாடுகள் உள்ளன என்பது தெளிவு. இவற்றை மேற்கொள்வது இலகுவான காரியம் அல்ல. இருப்பினும் முன்னோடி நடவடிக்கைகளாகப் பின்வரும் செயற்பாடுகளை நடமுறைப்படுத்தலாம்.
1. நாடகக் கலையில் ஆர்வமுள்ளவர்கள் ஒன்றிணைந்து ஒவ்வொரு நகரத்திலும் நாடகக் குழுக்களை அமைத்து, பெயருக்கு மட்டும் இயங்குகின்ற மன்றங்களாக அமையாது, சிறிய அளவிலாவது தரமான நாடகங்களை அரங்கேற்ற ஆவன செய்தல்.
2. சரியான முறையில் எழுதப்பட்ட நாடகப்பிரதிகளைப் பயன்படுத்தி, ஒத்திகைகளை ஒழுங்காக நடத்திக் கட்டுக்கோப்பான முறையில் நாடகங்களை அரங்கேற்றுதல்.
3. நாடகத் தயாரிப்பு ஒரு கூட்டு முயற்சி என்று உணர்ந்து அனைவரும் தங்கள் தங்கள் பங்களிப்புகளை உள்ளுணர்வோடு வழங்குதல்.
4. தனிப்பட்ட ஒருவரின் நடிப்புத்திறனைக் காட்டுவதற்காக நாடகப் பிரதிகளை எழுதாது, கூடியமட்டில் பங்குபற்றும் அனைவருக்கும் நடிப்புக்குச் சந்தர்ப்பம் இருக்கக்கூடியதாக நாடகப் பிரதிகளை எழுதுவது.
5. 'எனக்கு ஒரு சிறிய பாகம்தானே, நான் ஒத்திகைகளுக்கு ஒழுங்காகப் போகவேண்டியது அவசியம் அல்ல' என்ற மனப்பாங்குடன் நடிகர்கள் அரை குறை மனத்துடன் நாடகங்களில் பங்குபற்றுவதை விடுத்து, சிறிய பாகமும் நாடகத்தின் முழுமைக்கு மிகமிக அவசியம் என்று உணர்ந்து ஒத்து உழைத்தல்.
6. இயக்குநர், தயாரிப்பாளர் ஆகியோர் திரைக்குப் பின்னிருந்து இயக்க வேண்டுமே தவிரத் தமது பெயரையும் புகழையும் முன்வைக்கும் வண்ணம் நடந்து கொள்ளல் ஆகாது.
7. கலை கலைக்காக என்ற முறையில் வித்துவத் தன்மைகளைக் காட்டவேண்டும் என்று, தயாரிப்புகளிலே எடக்கு முடக்குகளை வைத்துப் பார்ப்போரைக் குழப்ப நிலைக்கு உட்படுத்தும் தயாரிப்புகளைத் தவிர்த்துக் கொள்வது.
8. அதிகப்படியான தொழில் நுட்பங்களை வைத்து, அவற்றில் மட்டுமே கவனத்தைச் செலுத்தி, நாடகக் கதையையும், கருவையும் கைவிட்டு விடாமல் இருத்தல்.
9. மூன்றுமணி நேரம் நிகழ்ச்சி வழங்கப்படவேண்டும் என்று எண்ணிக்கொண்டு நாடகத்தை நீட்டி முடக்கிப் பார்வையாளரின் பொறுமையைச் சோதிக்காதிருத்தல்.
10. மேடை அமைப்பு, ஒலி, ஒளி, விளம்பரம், நுழைவுச் சீட்டுகள் விற்பனை, மண்டப ஒழுங்கு, ஒப்பனை முதலிய துறைகளைத் தனித்தனி ஒவ்வொரு குழுவிடம் பொறுப்புக் கொடுத்து அவர்கள் அனைவரையும் ஒருங்கிணைத்து ஒரு கூட்டுமுயற்சியாக நாடகங்களைத் தயாரித்தல்.
11. நாடகப் பட்டறவுப் பயிற்சி வகுப்புகளை நடத்தி, நாடகத்துறையில் இளைஞருக்கு ஆர்வத்தை உண்டுபண்ணுதல்.
12. நாடகங்களை அடிக்கடி அரங்கேற்றி இரசிகர்களுக்கு நாடகக் கலையில் விருப்பத்தை உண்டுபண்ணுவது.
13. தமிழ்க் கல்வி நிலையங்கள் நாடகத்தையும் பயிற்ற ஏற்பாடுகள் செய்தல்.
14. நல்லபல கொள்கைகளைப் பரப்புகின்ற சாதனமாக நாடகக்கலை வளர, அதை மக்கள் விரும்பித் தாமாகவே சென்று அனுபவிக்கும் ஒரு சூழ்நிலையை உருவாக்கக் கலைஞர்களும், அவர்களோடு சேர்ந்தவர்களும் நேரம், பணம், பொருள் முதலியவற்றைத் தியாகம் செய்யத் தயாராயிருத்தல்.
முடிவுரை :
சொல்வதும், எழுதுவதும் சுலபம். செயற்படுத்துவது கடினம். மேற்கண்ட விடயங்களை நாடகப் பிரியர்களும், நடிகர்களும் தயாரிப்பாளர்களும் கவனித்துச் செயற்பட்டால் எதிர்காலத்தில் தமிழ்நாடகக் கலை, மேலைநாட்டவர்களின் நாடகக் கலையின் நிலையைப் படிப்படியாக அடையக்கூடிய வாய்ப்புப் புலம்பெயர்ந்த நாடுகளில் ஏற்படக்கூடும். இன்றேல், திரைப்படமும், தொலைக்காட்சியும், பேச்சுக்குப் பேச்சுக் கொடுக்கும் தொலைபேசி வானொலிகளும் தமிழ் நாடகக்கலையை விழுங்கிவிடும் என்பதில் ஐயமே இல்லை.
தேடல் தொடர்பான தகவல்கள்:
புலம்பெயர்ந்த நாடுகளில் தமிழ் நாடகக்கலை - நாடகக் கலைக் கட்டுரைகள், நாடகக், நாடகப், முறையில், புலம்பெயர்ந்த, வானொலி, தமிழ், நாடகக்கலை, நாடுகளில், கலைக், நாடகங்களை, சிறிய, பிரதிகளை, கட்டுரைகள், ஒவ்வொரு, கலையில், அல்ல, நேரம், அவசியம், நாடகங்களிலும், செய்தல், தங்கள், உணர்ந்து, நாடகங்களைத், தரமான, கலைகள், arts, drama, இருப்பது, தமிழ்க், எதிர்காலத்தில், மேற்கண்ட, தொழில், நேரமும், மேடை