மேலே சொல்லிய இடங்களைத் தவிர வேறு இடங்களில் இருந்து, மேலே சொல்லிய உறுப்புகளைத் தவிர வேறு உறுப்புகளில் கடித்தால், பிரானேஷ்வர மந்திரத்தைச் சொல்லி பிழைக்கச் செய்யலாம். எட்டு இதழ்களை உடைய ஒரு தாமரையை வரைந்து இந்த மந்திரத்தை அதன் இதழ்களில் எழுதி, பாம்பால் கடிக்கப்பட்டவர் மேல் இந்தப் படத்தை வைத்து, அமர்ந்து இருந்து கொண்டு கீழே மந்திரங்களை திருப்பித் திருப்பிச் சொல்லவேண்டும். உருக்கிய நெய்யைக் கடிபட்டவனுக்குக் கொடுத்து குடிக்கச் சொன்னால் அவன் பிழைக்க உதவியாக இருக்கும். இம்மந்திரங்கள் ஜெபிக்கப் படும்போது, கை நிறைய சர்க்கரையை வீட்டிற்குள் எறிந்தால் பாம்புகள் அந்தப் பக்கமே வராது.

சாளக்கிராமம்

சாளக்கிராமம் என்பது விஷ்ணுவைக் குறிக்கும் ஒரு வடிவமாகும். இது பலவகைப்படும். சங்கு, சக்கரம், பத்மம் ஆகிய அடையாளங்களை இதே வரிசையில் பெற்றிருப்பது கேசவ சாளக்கிராமம். இம்முறை மாறி சக்கரம், சங்கு பத்மம், கதை என்ற வரிசையில் பெற்றிருப்பது மாதவ சாளக்கிராமம். பத்மம், கதை, சக்கரம், சங்கு வரிசையில் இருப்பது நாராயண சாளக்கிராமம். கதை, பத்மம், சங்கு, சக்கரம் வரிசையில் இருப்பது கோவிந்த சாளக்கிராமம். பத்மம், சங்கு சக்கரம் கதை வரிசையில் இருப்பது விஷ்ணு சாளக்கிராமம். சங்கு, பத்மம், கதை, சக்கரம் இருப்பது மதுசூதனன் சாளக்கிராமம். கதை, சக்கரம், சங்கு பத்மம் வரிசையில் இருப்பது திரிவிக்கிரம சாளக்கிராமம். பத்மம், சக்கரம், கதை, சங்கு வரிசையில் அமைந்திருப்பது பத்மநாப சாளக்கிராமம். சக்கரம், சங்கு, கதை, பத்மம் வரிசையில் அமைந்திருப்பது வாசுதேவ சாளக்கிராமம். கதை, பத்மம், சக்கரம், சங்கு வரிசையில் அமைந்திருப்பது ஸ்ரீகிருஷ்ண சாளக்கிராமம்.

கோயில் அமைப்பு

கோயில்கள் ஐந்து வகைகளில் அமையலாம். அவை முறையே வைரஜா, புஷ்பகா, கைலாசா, மாளகா, திரிபிஷ்டபா. இவற்றிடையே வேறுபாடு இவற்றின் அமைப்பில் உள்ளதாகும். வைரஜா சதுர வடிவிலும், புஷ்பகா நீண்ட சதுர வடிவிலும், கைலாசா வட்ட வடிவிலும், மாளகா முட்டை வடிவிலும், திரிபிஷ்டகா அறுகோண வடிவிலும் அமைந்திருக்கும். இந்த முழு அமைப்பில் உள்ளே வேண்டுமான மாற்ற அமைப்புகள் இருக்கலாம். கோயிலின் நுழைவாயிலின் பக்கத்தில் நாடகம் நடத்துவதற்குக் களம் அமைக்கப்பட வேண்டும். கோயில் பூசாரி, கோயிலுக்குச் சற்றுத் தள்ளி குடியிருக்க வேண்டும். கோயிலைச் சுற்றி நந்தவனங்கள், குளங்கள் முதலியன இருத்தல் வேண்டும்.

சோதிட நம்பிக்கைகள்

27 நட்சத்திரங்களில் அஸ்வினி, அனுஷம், ரேவதி, மிருகசீரிடம், மூலம், புனர்வசு, பூசம், ஹஸ்தம் என்ற இந்த நட்சத்திரங்கள் பிரயாணத்திற்கு உகந்தவை. கிணறு, குளம் வெட்ட பரணி, கார்த்திகை ஆயில்யம், மகம், மூலம், விசாகம், பூரட்டாதி என்ற நட்சத்திரங்கள் உகந்தவை. இதே நட்சத்திரங்கள் தானியம் அறுவடை செய்யவும், கோயில் கட்டவும் உகந்தவை. விதை விதைக்க ரேவதி, அஸ்வினி, சித்திரை, ஸ்வாதி, ஹஸ்தம், புனர்பூசம், அனுஷம், மிருகசீரிடம் ஆகியவை ஏற்றவையாம்.