¹ ஆனால் நீதிமான்களின் ஆன்மாக்கள் கடவுளின் கையிலுள்ளன, வேதனை எதுவும் அவர்களைத் தீண்டாது.

² அறிவிலிகளின் கண்களில் அவர்கள் செத்துப் போனதாகத் தோன்றினர், இம்மையினின்று அவர்கள் பிரிந்தது பெருந்துன்பமாய்க் கருதப்பட்டது,

³ நம்மிடமிருந்து அவர்கள் போனது அவர்களுக்கு அழிவென எண்ணப்பட்டது@ ஆனால் அவர்கள் சமாதானத்தில் இருக்கிறார்கள்.

⁴ ஏனெனில் மனிதர்களுக்கு முன் பாவ வேதனையடைந்திருந்தாலும், அவர்களது நம்பிக்கையோ சாகாமையால் நிரம்பியிருக்கிறது.

⁵ அற்பத் துன்பமுற்ற பின் அவர்கள் மாபெரும் நன்மையடைவார்கள், கடவுள் அவர்களைப் பரிசோதித்தார், பரிசோதித்துத் தமக்கேற்ற தகுதியுடையவர்கள் எனக் கண்டார்.

⁶ பொன்னை உலையிலிட்டுச் சோதிப்பது போல் அவர்களை பரிசோதித்தார், தகனப் பலியாக அவர்களை ஏற்றுக்கொண்டார்.

⁷ கடவுளின் வருகைக் காலத்தில், அவர்கள் சுடரொளி வீசுவார்கள்@ நாணற் காட்டில் தீப்பொறிகள் எரிவது போல் ஒளிர்வார்கள்.

⁸ புறவினத்தாரைத் தீர்ப்பிடுவார்கள், மக்களினங்களை ஆளுவார்கள்@ ஆண்டவர் அவர்கள் மேல் என்றென்றும் ஆட்சி செலுத்துவார்.

⁹ அவரில் நம்பிக்கை வைக்கிறவர்கள் உண்மையைக் கண்டுபிடிப்பார்கள், விசுவாசம் கொண்டவர்கள் அவரோடு அன்பில் நிலைத்திருப்பார்கள், ஏனெனில் அருளும் இரக்கமும் அவரால் தேர்ந்துகொள்ளப் பட்டவர்களுக்கே உரியவை.

¹⁰ பொல்லாதவர்களோ அவர்கள் எண்ணத்திற்குத் தக்கபடி தண்டிக்கப்படுவார்கள்@ எனெனில் நீதிமானைப் புறக்கணித்து ஆண்டவரை எதிர்த்தார்கள்.

¹¹ ஞானத்தையும் ஒழுக்கத்தையும் புறக்கணிக்கிறவன் இரங்கத்தக்கவன், அவனது நம்பிக்கை வீணானது, அவனுடைய செயல்கள் பலனற்றவை, அவனுடைய வேலைகள் விழலுக்கிறைத்த நீரே@

¹² அவர்களுடைய மனைவியர் அறிவில்லாதவர்கள், அவர்கள் குழந்தைகள் பொல்லாதவர்கள், அவர்களது சந்ததி சாபத்திற்குள்ளானது. கெட்ட பிள்ளைகளைப் பெறுவதை விட மலடியாய் இருப்பதே மேல்.

¹³ தூய்மையிழக்காதவளும் முறைகேடான சேர்க்கையால் தீட்டுப் படாதவளுமான மலடி பேறுபெற்றவள்@ ஆன்மாக்களைக் கடவுள் சந்திக்க வரும் போது, அவள் கைம்மாறு பெற்றுக் கொள்வாள்.

¹⁴ தன் கைகளால் முறை தவறிய செயல்களைச் செய்யாமலும், ஆண்டவருக்கு எதிராகப் பொல்லாதவற்றைச் சிந்தியாமலும் இருக்கிற அண்ணகனும் பேறுபெற்றவனே. அவனது பிரமாணிக்கத்திற்காகச் சிறப்பான சலுகை அவனுக்குக் கிடைக்கும்@ கடவுளின் திருக்கோயிலில் இனிமை மிக்க பங்கு தரப்படும்.

¹⁵ நற்செயல்களின் பலன் மகிமை நிறைந்தது, அறிவின் வேர் ஒரு போதும் காய்ந்து போகாது.

¹⁶ விபசாரிகளின் மக்களோ முதுமை வரை வாழ மாட்டார்கள், முறைகேடான சேர்க்கையால் பிறந்த பிள்ளை அழிந்து போகும்.

¹⁷ அவர்கள் நெடுங்காலம் வாழ்ந்தாலும், அவர்களை யாரும் பொருட்படுத்த மாட்டார்கள்@ அவர்களின் முதுமையின் இறுதியில் கூட அவர்களுக்கு மதிப்பு தரப்படமாட்டாது.

¹⁸ அவர்கள் இளமையில் இறந்தாலோ, அவர்களுக்கு நம்பிக்கையே இராது, தீர்வையின் நாளில் ஆறுதலும் கிடைக்காது.

¹⁹ உள்ளபடியே பொல்லாதவர்களின் முடிவு அச்சத்திற்குரியது.