¹ யோவாரிபின் புதல்வரில் குருவான சீமோனின் புதல்வர் அருளப்பனின் புதல்வராகிய மத்தத்தியாஸ் என்பவர் அப்பொழுது யெருசலேமை விட்டு மோதின் மலை சேர்ந்தார்.

² அவருக்கு ஐந்து புதல்வர் இருந்தனர். அவர்கள்:

³ காதிஸ் எனப்பட்ட அருளப்பனும், தாசி எனப்பட்ட சீமோனும்,

⁴ மக்கபேயுஸ் என்ற யூதாசும், அபாரோன் எனப்பட்ட எலேயாசாரும்,

⁵ ஆபுஸ் எனப்பட்ட யோனாத்தாசும் ஆவர்.

⁶ யூத மக்களுக்கு யெருசலேமில் செய்யப்பட்ட கொடுமைகளை இவர்கள் கண்டார்கள்.

⁷ ஐயோ, எனக்குக் கேடாம்! என் மக்கள் படும் தொல்லையையும், புனித நகரத்தின் அழிவையும் நான் பார்க்கவோ பிறந்தேன்! பகைவர் கையில் அது அகப்படும் போது நான் இவ்விடம் உட்கார்ந்திருக்கலாமோ?

⁸ புனித இடம் அன்னியர் வசமானது. ஆலயம் கயவனைப் போல் ஆனது

⁹ அதன் மாட்சியின் பாத்திரங்கள் பறிமுதலாயின. அதன் மூத்தோர் தெருக்களில் கொலையுண்டார்கள். இளைஞரோ பகைவரின் வாளால் வெட்டி வீழ்த்தப்பட்டார்கள்.

¹⁰ அதன் அரசைக் கைப்பற்றாத இனத்தார் யார்? அதன் பொருட்களைக் கொள்ளையடிக்காதவர்கள் யார்?

¹¹ அதன் அலங்காரமெல்லாம் அழிந்து போனது. தன்னுரிமையோடு நடந்தது போய், இப்போது அது அடிமை போல் ஆனது.

¹² நம் புனித காரியங்களும் அழகும் ஒளியும் குன்றிப்போக, அவைகளைப் புறவினத்தார் தீட்டுப்படுத்தினார்கள்.

¹³ நாம் ஏன் இனியும் வாழ வேண்டும் என்று மத்தத்தியாஸ் சொல்ல,

¹⁴ அவரும் அவர் புதல்வரும் தங்கள் ஆடைகளைக் கிழித்துக் கொண்டு, தவச்சட்டைகளை அணிந்து மிகவும் புலம்பினார்கள்.

¹⁵ மோதின் நகரத்திற்கு ஓடிப்போனவர்களைப் பலியிடவும், தூபம் ஏந்தவும், கடவுள் கட்டளையை மீறவும் கட்டாயப்பட்டவர்கள் அந்தியோக்கஸ் அரசனால் அனுப்பப்பட்டவர்கள் அவ்விடம் வந்தார்கள்.

¹⁶ இஸ்ராயேல் மக்களில் பலர் இசைந்தவர்களாய் அவர்களிடம் சென்றார்கள். ஆனால், மத்தத்தியாசும் அவர் புதல்வரும் உறுதியில் நிலைகொண்டார்கள்.

¹⁷ அந்தியோக்கசால் அனுப்பப்பட்டவர்கள் மத்தத்தியாசை நோக்கி: இந்த நகரத்தில் நீர் சீரும் சிறப்பும் மிக்க பிரபுவாய் இருக்கிறீர். உம் புதல்வரும் சகோதரரும் உமக்கு ஓர் அணிகலன் போல் இருக்கிறார்கள்.

¹⁸ ஆதலால், புறவினத்தாரும் யூத மக்களும், யெருசலேமில் தங்கினவர்களும் செய்த வண்ணம், நீரும் முதன் முதல் அரசன் கட்டளையை நிறைவேற்றும். நீரும் உம் புதல்வர்களும் அரசனின் நண்பர்களாவீர்கள். பொன், வெள்ளி, மற்றும் பல்வேறு பரிசுகளால் நீர் நிரப்பப்படுவீர், என்றார்கள்.

¹⁹ அதற்கு மறுமொழியாக மத்தத்தியாஸ் உரத்த சத்தமாய்: எங்கள் முன்னோரின் வழக்கத்தை அனுசரிப்பதை எல்லா இனத்தவரும் விட்டு விட்டு அந்தியோக்கஸ் அரசருக்குக் கீழ்ப்படிந்தாலும், அவர் கட்டளைகளை அனுசரிக்க இசைந்தாலும்,

²⁰ நானும் என் புதல்வரும் என் சகோதரரும் எங்கள் முன்னோரின் கட்டளைக்கே கீழ்ப்படிவோம்.

²¹ கடவுள் எங்கள் மேல் இரக்கமும் கொள்வாராக. அவருடைய கட்டளைகளையும் ஏற்பாடுகளையும் விட்டு விடுவதனால் எங்களுக்கு யாதொரு இலாபமும் இல்லை.

²² அந்தியோக்கஸ் அரசரின் வார்த்தைகளைக் கேட்கவும் மாட்டோம். எங்கள் சட்டங்களால் விதிக்கப்பட்ட கட்டளைகளை மீறி வேறு விதமாய் நடக்கவும், பலியிடவும் மாட்டோம் என்றார்.

²³ உடனே அரசன் கட்டளைப்படி மோதின் நகரத்துப் பீடத்தின் மேல் சிலைகளுக்குப் பலியிட யூதன் ஒருவன் எல்லாருக்கும் முன்பாக வந்தான்,

²⁴ மத்தத்தியாஸ் அதைப் பார்த்தார். மனம் கசிந்தார், அவர் உடம்பு துடித்தது. கட்டளையின் ஒழுங்குப்படி கோபம் மூண்டு, அவன் மேல் பாய்ந்து, பீடத்தின் மீதே அவனைக் கொன்றார்.

²⁵ அந்தியோக்கசால் அனுப்பப்பட்டு, பலியிடும்படி வற்புறுத்தின மனிதனையும் அதே நேரத்தில் கொன்று, பீடத்தையும் இடித்துத் தள்ளினார்.

²⁶ சலோமியின் மகன் சாம்பரி என்பவனுக்குப் பினேயஸ் செய்தது போல, தாமும் கட்டளையின்பால் கொண்ட ஆர்வத்தால் துண்டப்பட்டார்.

²⁷ அப்போது அந்த நகரத்தில் மத்தத்தியாஸ் உரத்த சத்தமாய்: உடன்படிக்கைக் கட்டளைக்குப் பிரமாணிக்கமுள்ளவன் எவனோ அவன் என் பின்னால் வரக்கடவான் என்று சொல்லி,

²⁸ அவரும் அவர் புதல்வரும் தங்கள் சொத்துகளை விட்டுவிட்டு மலைகளுக்கு ஓடிப்போனார்கள்.

²⁹ அப்போது பலர் நியாய ஏற்பாடுகளையும் நீதியையும் தேடி பாலைவனத்திற்குச் சென்றார்கள்.

³⁰ அவர்களும் அவர்கள் புதல்வரும் மனைவியரும் மந்தைகளோடு அவ்விடத்தில் தங்கினார்கள். ஏனென்றால், அவர்கள் தீச் செயல்களில் மூழ்கியிருந்தார்கள்.

³¹ அரசன் கட்டளையை மீறிய பலர் பாலைவனத்தின் மறைவிடங்களுக்குப் போய்விட்டார்களென்றும், அவர்கள் பின்னால் இன்னும் பலரும் போயிருக்கிறார்களென்றும் தாவீதின் நகராகிய யெருசலேமில் இருந்த அரசனுடைய மனிதருக்கும் படைக்கும் தெரிவிக்கப்பட்டது.

³² இவர்கள் உடனே அவ்விடம் சென்று அவர்கள் மேல் ஓய்வுநாளில் போர்தொடுத்தனர். மேலும், இவர்கள்:

³³ இன்னும் நீங்கள் எங்களை எதிர்க்கிறீர்களோ? வெளியே வந்து, அந்தியோக்கஸ் அரசன் கட்டளைப்படி செய்வீர்களேயானால் பிழைப்பீர்கள், என்றார்கள்.

³⁴ அவர்களோ: ஓய்வு நாள்முறை தவறாதபடிக்கு வெளியே வரவுமாட்டோம்@ அரசன் செற்படி நடக்கவுமாட்டோம், என்றார்கள்.

³⁵ ஆதலால், இவர்கள் அவர்களை வலிமையோடு தாக்கினார்கள்.

³⁶ ஆனால், அவர்கள் இவர்களை எதிர்க்கவுமில்லை. இவர்கள் மேல் கற்களை எறியவுமில்லை@ தங்கள் குகைகளை அடைத்துக் கொள்ளவுமில்லை.

³⁷ மாறாக, அமைதியான மனத்தோடு நாங்கள் எல்லோரும் சாவோம்@ நீங்கள் எங்களை அநியாயமாய்க் கொலை செய்கிறீர்களென்பதற்கு வானமும் பூமியும் சாட்சியாய் இருக்கும், என்றார்கள்.

³⁸ இவர்கள் ஓய்வு நாளில் அவர்களோடு சண்டை செய்ததால், அவர்களும் அவர்கள் மனைவியரும் பிள்ளைகளும் ஆயிரம் பேர் வரை தம் மந்தைகளோடு மாண்டார்கள்.

³⁹ இதைக் கேள்வியுற்ற மத்தத்தியாசும் அவர் நண்பரும் அதிகத் துக்கம் அடைந்தார்கள்.

⁴⁰ அப்போது ஒருவன் மற்றொருவனை நோக்கி: நமது உயிரையும் கட்டளையையும் காப்பாற்ற நமது சகோதரர் செய்தது போல நாமெல்லோரும் போர் செய்யாவிடில் நம்மையும் பூமியினின்று விரைவில் ஒழித்து விடுவார்கள், என்றான்.

⁴¹ திரும்பவும் அவர்கள் தங்களுக்குள் ஓய்வுநாளில் யார் நம்மை எதிர்த்துப் போரிட வந்தாலும், அவர்களோடு நாமும் போர்புரிவோம்@ நம் சகோதரர் தாங்கள் ஒளிந்திருந்த இடத்தில் மடிந்தது போல நாமும் மடியாதிருக்கக்கடவோம் என்று தீர்மானித்துக் கொண்டார்கள்.

⁴² இஸ்ராயேலரில் வலிமை வாய்ந்தவர்களான அசிதேயரின் ஒரு கூட்டத்தார் அவர்களோடு சேர்ந்து கொண்டனர்.

⁴³ இவர்கள் எல்லாரும் சட்டத்தை முன்னிட்டு ஒருமனதாகச் சேர்ந்தார்கள். கொடுமைக்குத் தப்பிக் கொள்ள ஓடிப்போனவர்களும் அவர்களோடு சேர்ந்து கொண்டதால், அவர்களது சேனை வலுப்பெற்றது.

⁴⁴ அவர்கள் படைகளைக் கூட்டி, பாவிகளைச் சினங்கொண்டும், தீயவர்களை மிகுந்த கோபத்தோடும் தாக்கினார்கள். இவர்களோ தப்பிக்கொள்ளத் தங்கள் இனத்தாரிடம் ஓடிவிட்டார்கள்.

⁴⁵ மத்தத்தியாசும் அவர் நண்பரும் எங்கும் சுற்றித்திரிந்து பீடங்களை அழித்தார்கள்.

⁴⁶ இஸ்ராயேல் எல்லைகளில் கண்ட விருத்தசேதனம் பெறாத பிள்ளைகளுக்குத் துணிவுடன் விருத்தசேதனம் செய்வித்தார்கள்.

⁴⁷ அகந்தையின் மக்களை வதைத்துப் பின்தொடர்ந்தார்கள். அவர்கள் நினைத்த காரியங்களெல்லாம் வெற்றியாயின.

⁴⁸ புறவினத்தாருடையவும் அரசர்களுடையவும் அடிமைத்தனத்தினின்று அவர்கள் விடுபட்டார்கள். தீயவர் தங்களை மேற்கொள்ள இடம் கொடுக்கவில்லை.

⁴⁹ மத்தத்தியாஸ் சாகும் காலம் நெருங்கிய போது தம் பிள்ளைகளை நோக்கி: இப்போது அகந்தையின் அரசு உறுதிப்பட்டது. இது கடவுளுடைய தண்டனைக்கும் அழிவுக்கும் கோபத்துக்கும் உரிய காலம்.

⁵⁰ ஆதலால், என் மக்களே, இப்போது கட்டளையை ஆர்வத்தோடு கடைப்பிடியுங்கள். உங்கள் முன்னோரின் உடன்படிக்கைக்காக உங்கள் உயிரைக் கொடுங்கள்.

⁵¹ உங்கள் முன்னோர்கள் தங்கள் காலத்தில் நடந்து கொண்ட முறையை நினைத்துக் கொள்ளுங்கள். அப்போது தான் பெருமாட்சியையும் நிலைப்பேற்றையும் அடைவீர்கள்.

⁵² ஆபிரகாம் சோதனையில் விசுவாசியாய் நிலைகொள்ளவில்லையோ? நீதிமானாக எண்ணப்படவில்லையோ?

⁵³ சூசை தமக்கு இக்கட்டு நேரிட்ட காலத்தில் கடவுளின் கட்டளையைக் காத்தார்@ எகிப்து நாட்டின் ஆளுநரானார்.

⁵⁴ நம் தந்தையான பினேயஸ் கடவுள் பால் மிக்க பற்றுக் கொண்டிருந்தமையால் நித்திய குருத்துவத்தின் உடன்படிக்கையைப் பெற்றுக் கொண்டார்.

⁵⁵ யோசுவா கட்டளையை நிறைவேற்றியதால் இஸ்ராயேலின் தலைவரானார்.

⁵⁶ காலேப், கடவுள் ஆலயத்தில் மக்களுக்குத் திடம் சொன்னதால் சொத்துரிமை பெற்றார்.

⁵⁷ தாவீது தம் இரக்க சிந்தையால் என்றென்றைக்கும் அரசரானார்.

⁵⁸ எலியாஸ், கடவுள் கட்டளைமேல் ஆர்வம் கொண்டிருந்ததால் விண்ணில் சேர்க்கப்பட்டார்.

⁵⁹ அனானியாஸ், அசாரியாஸ், மிசாயேல் ஆகியோர் விசுவாசத்தால் நெருப்பினின்று மீட்கப்பட்டார்கள்.

⁶⁰ தானியேல் தம் மாசற்ற தன்மையால் சிங்கத்தின் வாயினின்று காப்பாற்றப்பட்டார்.

⁶¹ தலைமுறை தலைமுறையாய் இவ்வாறே நடந்து வந்துள்ளதென்று அறிந்து கொள்ளுங்கள். ஏனென்றால், கடவுளை நம்பினோர் கைவிடப்படார்.

⁶² தீயவனுடைய வார்த்தைகளுக்கு அஞ்சாதீர்கள். ஏனென்றால் அவன் பெருமை சகதியும் புழுவும் போல் இருக்கிறது.

⁶³ அவன் இன்று உயர்த்தப்படுகிறான்@ நாளை காணப்பட மாட்டான்@ தான் உண்டான பூமிக்குத் திரும்பினவுடனே அவனைப் பற்றிய நினைவும் ஒழிந்து போகும்.

⁶⁴ நீங்களோ, என் மக்களே, துணிவு கொள்ளுங்கள்@ கட்டளைப்படி ஆண்மையுடன் செயநீபடுங்கள். ஏனென்றால், அதனால் மாட்சி அடைவீர்கள்.

⁶⁵ இதோ, உங்கள் சகோதரன் சீமோன் மிகவும் முன்மதி உள்ளவன். அவன் சொல்வதை எப்பொழுதும் கேளுங்கள். அவன் உங்களுக்குத் தந்தை போல இருப்பானாக.

⁶⁶ இளமை முதல் வலிமை படைத்தவனாகிய யூதாஸ் மக்கபேயுஸ் உங்கள் படைத்தலைவனாக இருந்து சண்டையை நடத்தக்கடவான்.

⁶⁷ கட்டளையைப் பின்பற்றி நடக்கிறவர்கள் எல்லாரையும் ஒன்று சேர்த்து, உங்கள் மக்களை வதைக்கிறவர்களைப் பழிவாங்குங்கள்.

⁶⁸ அவர்கள் உங்களுக்குச் செய்துள்ள கொடுமையை அவர்களுக்குச் செய்யுங்கள். ஆனால், கட்டளையைப் பொறுத்தமட்டில் எச்சரிக்கையாய் இருங்கள் என்று சொல்லி,

⁶⁹ அவர்களை ஆசீர்வசித்த பிறகு தம் முன்னோரோடு சேர்க்கப்பட்டார்.

⁷⁰ அவர் நூற்று நாற்பத்தாறாம் ஆண்டு இறந்தார். மோதின் நகரத்தில் தம் முன்னோர் கல்லறையில் தம் புதல்வரால் அடக்கம் செய்யப்பட்டார். எல்லா இஸ்ராயேலரும் மிகவும் துக்கப்பட்டார்கள்.