¹ அவர்கள் போன பின்னர் யூதித் தன் செபக் கூடத்தில் நுழைந்து மயிராடை அணிந்து, தன் தலையில் சாம்பலைத் தூவிக் கடவுளுக்கு முன் நெடுங்கிடையாய் விழுந்து ஆண்டவரிடம் அபயமிட்டாள்.

² என் தந்தை சிமையோனின் கடவுளான ஆண்டவரே, கெட்ட ஆசையால் உந்தப்பட்டு ஒரு கன்னிப் பெண்ணைக் கற்பழித்த புறவினத்தாரைப் பழி வாங்கும் பொருட்டு, சிமையோனுக்கு நீர் ஒரு வாளைக் கொடுத்தீர்.

³ அத்தோடு ஆர்வத்துடன் உம் பக்கம் நின்ற உம் ஊழியர்களுக்கு அப்புறவினத்தாரின் மனைவியரைக் கொள்ளைப் பொருளாகவும், அவர்கள் புதல்வியரை அடிமைகளாகவும், அவர்களது சொத்தையெல்லாம் சொந்தமாகவும் தந்தருளினீர். அதுபோல கைம்பெண்ணான எனக்கும் நீர் உதவிசெய்ய வர வேண்டும் என்று உம்மைக் கெஞ்சி மன்றாடுகிறேன்.

⁴ முந்தினவற்றைச் செய்து முடித்தவர் நீரே. ஒன்றுக்குப் பின் ஒன்றாகத் திட்டமிட்டவரும் நீரே. உம் திட்டங்களே நிறைவேறி வந்துள்ளன.

⁵ ஏனெனில் உம் வழிகளை எல்லாம் நீர் முன்னேற்பாடு செய்து, முன்னறிவுடன் உம் தீர்ப்புகளை அளித்து வருகின்றீர்.

⁶ எகிப்தியரின் படைகளை நீர் முறியடித்தது போல் அசீரியரின் படைகளையும் முறியடித்தருளும். அக்காலத்தில் எகிப்தியர் தம் தேர்களிலும் குதிரைகளிலும் கணக்கற்ற தங்கள் வீரர்களிலும் நம்பிக்கை வைத்து ஆயுதம் தாங்கியவர்களாய் உம் ஊழியர்களைப் பின்தொடர்ந்து செல்லுகையில், உமது பார்வை அவர்கள் மேல் விழுந்தது.

⁷ உடனே அவர்கள் இருளில் அகப்பட்டு வருந்தினார்கள்.

⁸ பாதாளத்தில் அவர்கள் கால் செல்ல, தண்ணீரில் அவர்கள் மூழ்கினார்கள்.

⁹ ஆண்டவரே, இவர்களுக்கும் அவ்வாறே நேரிடுவதாக! இவர்களும் தம் திரளான வீரர்களையும் தேர்களையும் வேல்களையும் கேடயங்களையும் அம்புகளையும் நம்பி, ஈட்டியைக் கையாளுவதில் திறமை வாய்ந்தவர்கள் என்று பெருமை பாராட்டுகிறார்கள்.

¹⁰ நீர் எம் கடவுள் என்றும், நீர் தொன்றுதொட்டே படைகளை அழிக்க வல்லர் என்றும், உமது பெயர் ஆண்டவர் என்றும் அவர்கள் அறியார்கள்.

¹¹ தொடக்கத்திலிருந்து நீர் செய்து வருவது போல், உமது கைவன்மையால் அவர்களது ஆற்றலைத் தகர்த்தெறியும்@ உமது திருத்தலத்தை மாசுபடுத்துவோம் என்றும், உமது திருப்பெயர் விளங்கும் ஆலயத்தைத்தீட்டுப்படுத்துவோம் என்றும், தங்கள் வாளால் உமது பலிபீடத்தைத் தரை மட்டமாக்குவோம் என்றும் சபதம் கூறியுள்ள இவர்களின் ஆற்றல் உமது கடுங் கோபத்தின்முன் அற்றுப் போவதாக!.

¹² (என் எதிரியின்) அகந்தை அவனது சொந்த வாளுக்கே இரையாகும்படி செய்வீராக!

¹³ அவன் என் கண் என்ற கண்ணியிலே சிக்கிக் கொள்ளட்டும். என் நயமான மொழிகளால் அவனை வீழ்த்தியருளும், ஆண்டவரே!

¹⁴ நான் அவனைத் துரும்பாக எண்ணும்படி வேண்டிய திடனையும், நான் அவனை வெல்லத் தக்க ஆற்றலையும் எனக்குத் தாரும்.

¹⁵ ஏனெனில் ஒரு பெண்ணே அவனை வீழ்த்துவாளாயின், அது உமது திருப்பயெரின் மகிமைக்குச் சான்றாய்த் திகழும் அன்றோ!

¹⁶ ஏனெனில், ஆண்டவரே உமது ஆற்றல் சேனையின் பலத்தில் அன்று@ உமது திருவுளத்தை நிறைவேற்ற நீர் குதிரைப்படைப் பலத்தை எதிர் நோக்கியிருப்பதுமில்லை. செருக்குற்றோரை நீர் என்றும் விரும்பியதில்லை. ஆனால் தாழ்ச்சியும் சாந்தமுமுள்ளோரின் மன்றாட்டை நீர் ஒருபோதும் புறக்கணித்ததில்லை.

¹⁷ விண்ணகக் கடவுளே, தண்ணீரைப் படைத்தவரே, எல்லாப் படைப்புக்கும் ஆண்டவரே, உமது இரக்கத்தில் முழு நம்பிக்கை கொண்டு உம்மை மன்றாடும் பாவி எனக்குச் செவிக்கொடுத்தருளும்.

¹⁸ உமது உடன் படிக்கையை நினைவுகூர்ந்தருளும். ஆண்டவரே, உமது ஆலயம் என்றும் உமக்கு உரிய முறையில் புனிதத் தன்மையில் நிலைத்திருக்கும்படி எனக்கு நாவாற்றலைக் கொடுத்தருளும்@ நான் எண்ணியதை நிறைவேற்ற எனக்கு மனத்திடனை அளித்தருளும்.

¹⁹ இதனால் எல்லா இனத்தவரும் நீரே கடவுள் என்றும், உம்மைத் தவிர வேறு கடவுள் இல்லை என்றும் அறிந்துகொள்ளட்டும்" என்று மன்றாடினாள்.