¹ அப்பொழுது மெசொப்பொத்தேமியா, சீரியா, சோபாலின் சீரியா,லீபியா, சிலிசியா முதலிய நாடுகளின் எல்லா நகர்களினின்றும் மாநிலங்களினினிறும் அரசர்களும் மக்களும் தலைவர்களும் தத்தம் தூதுவர்களை ஒலொபெர்னசிடம் அனுப்பினர்.

² அவர்கள் அவனிடம் போய் அவனை நோக்கி, "எங்கள் மேல் தாங்கள் கோபம் கொள்ள வேண்டாம். நாங்கள் அடிமைப்பட்டுச் சாவதை விட, உயிரோடு மாமன்னர் நபுக்கோதனசாருக்கு ஊழியம் புரிவதும் உமக்குக் கீழ்ப்படிவதுமே நலம்.

³ இதோ, எம் நகர்களும் எங்கள் உடைமைகளும்- மலைகள், குன்றுகள், காடுகள், மாடுகள், செம்மறியாடு, வெள்ளாடு, குதிரை, ஒட்டகம் முதலிய எமது செல்வமும்,

⁴ எம் குடும்பங்களின் சொத்துகளுமாகிய, இவையாவற்றையும் உமது கையில் ஒப்படைக்கிறோம்.

⁵ நாங்களும் எம் புதல்வர்களும் உமக்கு அடிமைகளே.

⁶ நீர் சமாதானத் தலைவராக எம்மிடம் வந்து உமது விருப்பப்படியே எம்மை நடத்தும் என்றனர்.

⁷ அப்பொழுது அவன் மிகுந்த ஆற்றலோடு குதிரைப்படையுடன், மலைகளின்று இறங்கி வந்து எல்லா நகர்களையும், நாட்டில் வாழ்ந்து வந்த யாவரையும் தனக்கு அடிமைப் படுத்தினான்.

⁸ மேலும் அவன் கைப்பற்றியிருந்த ஒவ்வொரு நகரிலுமிருந்தும் ஆற்றல் படைத்தோரையும் போரிடக் கூடியவர்களையும் ஒரு துணைப்படையாகச் சேர்த்துக் கொண்டான்.

⁹ அந்நாடுகளில் எத்தகைய அச்சம் நிலவினதென்றால், நகர்வாழ் எல்லா மக்கள் தலைவர்களும், பெரியோர்களும் மக்களோடு சேர்ந்து, ஒலொபெர்னெசைச் சந்திக்கச் சென்றனர்.

¹⁰ முடிகளை அணிந்து கையில் தீவட்டி ஏந்தி, குழல் ஊதி, மேளம் கொட்டிக் கூத்தாடி அவனை வரவேற்கச் சென்றனர்.

¹¹ அவர்கள் இவ்வாறெல்லாம் செய்தும் அவனது கல் நெஞ்சத்தை அவர்களால் மாற்ற முடியவில்லை.

¹² ஏனெனில், அவன் அவர்கள் நகர்களை அழித்துச் சிலைத்தோப்புகளைப் பாழாக்கினான்.

¹³ காரணம் என்னவெனில், அரசன் நபுக்கோதனசார், "நீ எந்தெந்த இனத்தாரைத் தோற்கடித்துச் சிறைப்படுத்துவாயோ, அவ்வினத்தார் வழிபடும் தெய்வங்களையும் அழித்துப் போடு" என்று ஒலொபெர்னெசுக்குக் கட்டளையிட்டிருந்தான். மக்கள் தன்னை மட்டுமே கடவுள் என்று ஏற்றுக்கொள்ள வேண்டும் என்பதே அரசனின் எண்ணம்.

¹⁴ அதன் பின் ஒலொபெர்னெஸ், சோபாவின் சீரியாவையும், அப்பாமேயா, மெசொபொத்தேமியா ஆகிய நாடுகள் அனைத்தையும் கடந்து, காபாவா நாட்டில் குடியிருந்த இதுமேயரிடம் வந்து சேர்ந்தான்.

¹⁵ அவர்களின் நகர்களைக் கைப்பற்றி, முப்பது நாட்கள் அங்கே தங்கியிருந்தான். அப்பொழுது தன் படைகள் முழுவதும் ஒன்று கூடும்படி கட்டளையிட்டான்.