¹ அதற்கு யோபு சொன்ன மறுமொழி இதுவே:

² மெய் தான், நீங்கள் தான் மக்களின் குரல்@ நீங்கள் சாகும் போது ஞானமே செத்துப் போகும்.

³ ஆனால் உங்களைப் போல் எனக்கும் அறிவுண்டு@ உங்களினும் நான் தாழ்ந்தவனல்ல@ உங்களுக்குத் தெரிந்தது யாருக்குத் தான் தெரியாது?

⁴ கடவுளைக் கூவியழைத்து அவரிடமிருந்து மறுமொழி பெற்ற நான்- மாசற்ற நீதிமானாகிய நான்- என் நண்பர்களின் ஏளனத்திற்கு ஆளானேன்!

⁵ இன்ப வாழ்க்கையில் திளைப்பவன் துன்பத்தை வெறுக்கிறான்@ ஆனால் இடறி விழுவோருக்கு அது துணையாகக் காத்திருக்கிறது.

⁶ கள்ளர்களின் கூடாரங்கள் அமைதியாய் இருக்கின்றன, கடவுளுக்கு எரிச்சலூட்டுவோரும், தங்கள் கைவன்மையைக் கடவுளாய்க் கொள்வோரும் அச்சமின்றி வாழ்கின்றனர்.

⁷ ஆனால் மிருகங்களைக் கேளும், அவை உமக்குக் கற்பிக்கும்@ வானத்துப் பறவைகளை வினவும், அவை உமக்குச் சொல்லும்.

⁸ அல்லது ஊர்வனவற்றைக் கேளும், அவை உமக்கு விளக்கும்@ கடலின் மீன்கள் உமக்கு விவரித்துக் கூறும்.

⁹ ஆண்டவருடைய கையே இதைச் செய்ததென்பது இவை யாவற்றுள்ளும் எதற்குத்தான் தெரியாது?

¹⁰ உயிருள்ளவை அனைத்தின் வாழ்வும், எல்லா மனிதரின் மூச்சும் அவர் கையில் தான் உள்ளன.

¹¹ நாக்கு உணவைச் சுவை பார்ப்பது போல், காதும் சொற்களைச் சோதிக்கிறதன்றோ?

¹² முதியோரிடத்தில் ஞானமுண்டு, நீண்ட நாள் வாழ்ந்தவரிடம் அறிவு இருக்கிறது.

¹³ கடவுளிடம் ஞானமும் வல்லமையும் உள்ளன, புத்திக் கூர்மையும் அறிவு நுட்பமும் அவரிடம் உள்ளன.

¹⁴ அவர் இடித்தால், மீண்டும் கட்டியெழுப்ப எவனாலும் முடியாது@ அவர் மனிதனைச் சிறையில் வைத்தால், விடுவிக்க யாராலும் ஆகாது.

¹⁵ அவர் தண்ணீரைத் தடைசெய்தால், யாவும் வறண்டு போம்@ அவர் மடையைத் திறந்து விட்டாலோ, நிலமே மூழ்கிப் போகும்.

¹⁶ அவரிடம் ஆற்றலும் அறிவும் இருக்கின்றன@ ஏமாறுபவனும் ஏமாற்றுகிறவனும் அவருக்குக் கீழுள்ளவர்களே.

¹⁷ ஆலோசனைக்காரரை மதியிழக்கச் செய்கிறார், நீதிபதிகளை அறிவிலிகளாக்குகிறார்.

¹⁸ அரசர்களின் இடைக்கச்சைகளை அவிழ்த்துவிட்டு அவர்கள் இடுப்பிலே கயிற்றைக் கட்டுகிறார்.

¹⁹ அர்ச்சகர்களின் பெருமையைப் பறித்துக் கொள்வார், வல்லவர்களைக் கவிழ்த்து விடுவார்.

²⁰ சொல்வன்மை உள்ளவர்களை ஊமையாக்குவார், முதியவர்களின் மதிநுட்பத்தைப் பிடுங்கிக் கொள்வார்.

²¹ பெருங்குடி மக்கள் மேல் அவமானத்தைப் பொழிவார், ஆற்றல் படைத்தவர்களின் கச்சையைத் தளர்த்தி விடுவார்.

²² இருளின் ஆழத்திலுள்ளவற்றை வெளியாக்குவார், ஆழ்ந்த இருளை ஒளிக்குக் கொண்டு வருவார்.

²³ நாடுகள் மேன்மையடையவும் அழியவும் செய்கிறார், மக்களினங்கள் பரவவும் அழியவும் செய்கிறார்.

²⁴ உலக மக்களின் தலைவர்களிடமிருந்து அறிவை அகற்றுகிறார், திக்கற்ற பாலை வெளியில் அவர்களை அலையச் செய்கிறார்.

²⁵ ஒளியின்றி இருளிலே அவர்கள் தடவிக்கொண்டு நடக்கின்றனர், குடி போதையில் உள்ளவனைப்போல் அவர்களைத் தள்ளாடச் செய்கிறார்.