கடற்கானல் சேர்ப்ப! கழியுலாஅய் நீண்ட அடற்கானல் புன்னைதாழ்ந்து ஆற்ற - மடற்கானல் அன்றில் அகவும் அணிநெடும் பெண்ணைத்துஎம் முன்றில் இளமணல்மேல் மொய்த்து.

56

கடற்கானற் சேர்ப்பனே! கழிகள் சூழ்ந்து நீண்ட மீன் கொலைகளையுடைய கானலின்கண் மிகவும் புன்னை தழைக்கப்பட்டு, பூவிதழையுடைய இக்கானலின் கண் உள்ள அன்றில்கள் அழையாநின்ற அழகிய நெடும் பெண்ணையை யுடைத்து;எம் மில்லத்தின்முன் இளமணல்களும் மொய்த்து.

வருதிரை தானுலாம் வார்மணல் கானல் ஒருதிரை ஓடா வளமை - இருதிரை முன்வீழுங் கானல் முழங்கு கடற்சேர்ப்ப! என்வீழல் வேண்டா இனி.

57

வருதிரைதான் வந்து உலவாநின்ற ஒழுகிய மணற்கானலின்கண் ஒருதிரை வந்து பெயர்வதற்கு முன்னே இரண்டு திரை வந்து வீழாநின்ற கானலின்கண் வந்து முழங்கு கடற்சேர்ப்பனே! என்னால் வந்து இப் புணர்ச்சியை விரும்பல் வேண்டா;இனி வரைந்து கொள்வாய்.

மாயவனும் தம்முனும் போலே மறிகடலும் கானலும்சேர் வெண்மணலும் காணாயோ - கானல் இடையெலாம் ஞாழலும் தாழையும் ஆர்ந்த புடையெலாம் புன்னை புகன்று?

58

மாயவனும் அவன் முன்னோனும் போல, மறிகடலும் கடற்சோலையும் அச்சோலையைச் சேர்ந்த வெண்மணலும் பாராயோ! அக்கடற் சோலையின் நடுவெல்லாம் ஞாழலுந் தாழையுமாய் இருக்கும்; நிறைந்த மருங்கெல்லாம் புன்னையாயிருக்கும்; இவற்றையும் விரும்பிப் பாராய்.

பகல்வரின் கவ்வை பலவாம் பரியாது இரவரின் ஏதமும் அன்ன - புகஅரிய தாழை துவளும் தரங்கநீர்ச் சேர்ப்பிற்றே ஏழை நுளையர் இடம்.

59

பகல் வருவாயாயின், அலர்பலவு முளவாம்; அவ்வலர்க்கு இரங்காதே இரவு வருவையாயின், ஊறு வரும் ஏதமும் பலவுளவாம்; உள் புகுதற்கரிய தாழையடர்ந்த திரைநீர்ச் சேர்ப்பையுடைத்து, எங்கள் ஏழை நுளையர்வாழுமிடம்.

திரையலறிப் பேராத் தெழியாத் திரியாக் கரையலவன் காலினாற் கானாக் - கரையருகே நெய்தல் மலர்கொய்யும் நீள்நெடுங் கண்ணினாள் மையல் நுளையர் மகள்.

60

திரைகள் அலறிப் பெயரும் வகை தெழித்துத் திரிந்து கரையின்கண் அலவன்களைத் தன் காலினாலாராய்ந்து, கரையருகே நின்ற நெய்தன் மலர்களைக் கொய்யாநிற்கும் நீளிய நெடுங் கண்ணினாள் நுளையருடையமையன் மகள்.