கருங் குயில் கையற, மா மயில் ஆல, பெருங் கலி வானம் உரறும் - பெருந்தோள்! செயலை இளந் தளிர் அன்ன நின் மேனிப் பயலை பழங்கண் கொள.

16

பெரிய தோளினையுடையாய்! அசோகினது இளந்தளிர் போன்ற இன் உடம்பினது பசலையானது, மெலிவு கொள்ளவும், கரிய குயில்கள் செயலற்று துன்பமுறவும் , பெரிய மயில்கள் களித்து ஆடவும்..பெரிய ஒலியையுடைய மேகங்கள் முழங்காமல் நிற்கும். (தலைவன் வருகைக் கண்டு தலைவி மகிழ்ச்சியை அடைய)

அறைக் கல் இறு வரைமேல் பாம்பு சவட்டி, பறைக் குரல் ஏறொடு பெளவம் பருகி, உறைத்து இருள் கூர்ந்தன்று, வானம்; பிறைத் தகை கொண்டன்று, - பேதை! - நுதல்.

17

பேதையே! மேகமானது கடல் நீரைக் குடித்து, பறையொலி போலும் ஒலியையுடைய இடியேற்றாலே, பாம்புகளை வருத்தி பாறை கற்களையுடைய பக்க மலையின் மேல் நீரைச் சொரிந்து இருளை மிக்கது.(ஆதாலினால்) உனது நெற்றி பிறை மதியின் அழகை கொண்டதே!

கல் பயில் கானம் கடந்தார் வர, ஆங்கே நல் இசை ஏறொடு வானம் நடு நிற்ப, செல்வர் மனம்போல் கவின் ஈன்ற, நல்கூர்ந்தார் மேனிபோல் புல்லென்ற காடு.

18

மலைநெருங்கிய காட்டைக் கடந்து சென்ற தலைவர் , வந்த பொழுதே மேகங்கள் மிக்க ஒலியையுடைய உருமேற்றுடனே நடுவு நின்று எங்கும் பெய்தலால் வறுமையுற்றார் உடம்புபோல முன்பு பொலிவிழந்த காடுகள் பொருளுடையார் மனம் போல அழகைத் தந்தன.

நாஞ்சில் வலவன் நிறம் போலப் பூஞ் சினைச் செங் கால் மராஅம் தகைந்தன; பைங் கோல் தொடி பொலி முன் கையாள் தோள் துணையா வேண்டி, நெடு இடைச் சென்றது, என் நெஞ்சு.

19

கலப்பைப்படை வெற்றியையுடையவனது வெண்ணிறம் போல பூங்கொம்பினையும், செவ்விய தாளினையுமுடைய வெண்கடம்புகள் மலர்ந்தன.ஆதலால்..என் மனம், பசுமையாகிய திரண்ட வளைகள் விளங்குகின்ற முன்னங்கையை உடையவளின் தோள்கள் துணையாக வேண்டி நெடிய காட்டுவழியைக் கடந்து சென்றது. (கலப்பப்படை வென்றவன் - பலராமன்)

வீறு சால் வேந்தன் வினையும் முடிந்தன; ஆறும் பதம் இனிய ஆயின; ஏறொடு அரு மணி நாகம் அனுங்க, செரு மன்னர் சேனைபோல் செல்லும், மழை.

20

சிறப்பமைந்த அரசனுடைய போர்த்தொழில்களும் முற்றுப் பெற்றன.செவ்வியினியவாயின மேகங்கள்.அரிய மணியையுடைய பாம்புகள் வருந்தும் வகை உருமேற்றுடனே போர்புரியும் வேந்தரின்சேனை போல் செல்லா நிற்கும் (ஆதலால் நாமே செல்லக்கடவேம்)