சேயாறு சென்று துனைபரி யசாவா துசாவுநர்ப் பெறினே நன்றுமற் றில்ல வயச்சுறா எறிந்த புண்தணிந் தெந்தையும் நீனிறப் பெருங்கடல் புக்கனன் யாயும் உப்பை மாறி வெண்ணெல் தரீஇய	5
உப்புவிளை கழனிச் சென்றனள் இதனால் பனியிரும் மரப்பிற் சேர்ப்பற் கினிவரி னெளியள் என்னும் தூதே.
- கல்லாடனார்.

தோழி! என் தந்தையும் வலியை உடைய சுறாமீன் வீசியதனால் உண்டான புண் ஆறி மீண்டும் மீன் வேட்டை ஆடும் பொருட்டு நீல நிறத்தை உடைய பெரிய கடலினிடத்துப் புகுந்தனன்; என் தாயும் உப்பை விற்று வெண்ணெல்லை வாங்கி வரும் பொருட்டு அவ்வுப்பு உண்டாகின்ற அளத்திற்குச் சென்றாள்; அதனால்! குளிர்ச்சியை உடைய பெரிய பரப்பாகிய கடற்கரையை உடைய தலைவனுக்கு இப்பொழுது இங்கேவந்தால் தலைவி எளிதில் கண்டு பெறுதற்குரியள் என்னும் தூது மொழியை நெடுந்தூரமாகிய வழியைக் கடந்துபோய் விரையும் நடையினால் வருந்தாமல் கூறி உசாத் துணையாவாரைப் பெற்றால் மிக நல்லதாகும்; இஃது என் விருப்பம்.

முடிபு: ‘எந்தையும் கடல் புக்கனன்; யாயும் சென்றனள்; அதனால் இனி வரின் எளியள்' என்னும் தூதினைச் சேர்ப்பற்குக் கூறி உசாவுநர்ப் பெறின் நன்றுமன்.    

கருத்து: தலைவன் என்னோடு அளவளாவுதற்கேற்ற செவ்வி இது.