முல்லை நிலத்தின் அழகைக் கூறும் பாடல்கள் இதில் உள்ளன.

நன்றே காதலர் சென்ற ஆறே அணிநிற இரும்பொறை மீமிசை மணிநிற உருவின தோகையும் உடைத்தே.

431

காதலர் சென்ற வழி நன்று. அழகிய நிறம் கொண்ட மலை. மணி போல் நிறம் கொண்ட மயில் அதில் ஆடும்.

நன்றே காதலர் சென்ற ஆறே சுடுபொன் அன்ன கொன்றை சூடிக் கடிபுகு வனர்போல் மள்ளரும் உடைத்தே

432

அவர் சென்ற வழி நல்ல வழி. சுட்ட பொன் போல் கொன்றை மலரைச் சூடிக்கொண்டு திருமணம் செய்துகொள்பவர் போல மள்ளர்கள் வாழும் இடங்களைக் கொண்டது.

நன்றே காதலர் சென்ற ஆறே நீர்ப்பட எழிலி வீசும் கார்ப்பெயற்கு எதிரிய கானமும் உடைத்தே.

433

அவர் சென்ற வழி நல்ல வழி. நீரைப் பொழிவதற்காக மேகங்கள் காற்றை வீசும். கார் கால மழையை ஏற்பதற்காக காடுகள் காத்திருக்கும்.

நன்றே காதலர் சென்ற ஆறே மறியுடை மாண்பிணை உகளத் தண்பெயல் பொழிந்த இன்பமும் உடைத்தே.

434

அவர் சென்ற வழி நல்ல வழி. குட்டியுடன் பெண்மான் துள்ளி விளையாடும். ஈர மழை பொழியும் இன்பமும் அங்கு உண்டு.

நன்றே காதலர் சென்ற ஆறே நிலன் அணி நெய்தல் மலரப் பொலன்அணி கொன்றையும் பிடவமும் உடைத்தே.

435

அவர் சென்ற வழி நல்ல வழி. நிலத்துக்கு அழகு செய்ய நீரில் நெய்தல் மலரும். பொன் அணிகலன் போலக் கொன்றையும் பிடவமும் மலரும்.

நன்றே காதலர் சென்ற ஆறே நன்பொன் அன்ன சுடரிணர்க் கொன்றையொடு மலர்ந்த குருந்துமா ருடைத்தே.

436

அவர் சென்ற வழி நல்ல வழி. பொன்னைப் போல் மலர்ந்த கொன்றையோடு குருந்தம் பூக்களும் மலர்ந்திருக்கும்.

நன்றே காதலர் சென்ற ஆறே ஆலித் தண்மழை தலைஇய வாலிய மலர்ந்த முல்லையும் உடைத்தே.

437

அவர் சென்ற வழி நல்ல வழி. மழை பனிக்கட்டியுடன் பொழியும். அதைப் போல வெண்ணிறத்தில் பூத்திருக்கும் முல்லையும் அங்கு உண்டு.

நன்றே காதலர் சென்ற ஆறே பைம்புதல் பம்பூ மலர இன்புறத் தருந பண்புமார் உடைத்தே.

438

அவர் சென்ற வழி நல்ல வழி. புதர்களிலெல்லாம் பூக்கள் மலர இன்பமூட்டும் தகைமை உடையது.

நன்றே காதலர் சென்ற ஆறே குருந்தக் கண்ணிக் கோவலர் பெருந்தண் நிலைய பாக்கமும் உடைத்தே.

439

அவர் சென்ற வழி நல்ல வழி. கோவலர் குருந்தம் பூக்களைச் சூடிக்கொள்வர். அவர்கள் வாழும் குளுமையான ஊர்ப் பாக்கங்களும் அங்கு உண்டு.

நன்றே காதலர் சென்ற ஆறே தன்பெயல் அளித்த பொழுதின் ஒண்சுடர்த் தோன்றியும் தளவமும் உடைத்தே.

440

அவர் சென்ற வழி நல்ல வழி. ஈர மழை பொழிந்துகொண்டிருக்கும். தோன்றி, தளவம் ஆகிய பூக்கள் சுடர் விட்டுப் பூத்திருக்கும்.