குப்தர் ஆட்சிமுறை குறித்து பாஹியான் அளிக்கும் தகவல்கள் பயனுள்ளவை. குப்தர் ஆட்சி கருணைமிக்கதாக இருந்தது. மக்களது நடமாட்டத்திற்கு எவ்வித தடையும் இருக்கவில்லை. ஓவ்வொருவரும் தனிப்பட்ட சுதந்திரத்தை அனுபவிக்க முடிந்தது. தனிநபர் வாழ்க்கையில் அரசின் தலையீடு காணப்படவில்லை. தண்டனைகளும் கடுமையானதாக இல்லை. அபராதம் விதிப்பதே பொதுவான தண்டனை முநையாகும். ஒற்றர் முறை ஏதும் இல்லை. பயணிகளுக்கு பாதுகாப்புமிக்க சாலைகள், திருடர்கள் பயமின்மை போன்றவை குப்த ஆட்சிமுறையின் திறமைக்கு சான்று பகர்வதாகும். மக்கள் பொதுவாக வளமையான வாழ்க்கையை நடத்தியதாகவும், குற்றங்கள் மிகவும் குறைவாகவே இருந்ததாகவும் பாஹியான் குறிப்பிடுகிறார். கங்கைச் சமவெளி முழுவதும் எவ்வித பயமும் இல்லாமல் பயணம் செய்ய முடிந்தது என அவர் குப்தப் பேரரசின் ஆட்சியின் சிறப்பை புகழ்ந்து கூறுகிறார். மொத்தத்தில், மௌரியர் ஆட்சிமுறையைவிட, குப்தர் ஆட்சி மிகவும் சுதந்திரத்தன்மையுடையதாகவே காணப்பட்டது.

சமூக வாழ்க்கை

இந்தியாவில் குப்தர்கள் ஆட்சிக்கு முன்பு அயலவர் படையெடுப்புகள் தொடர்ந்து நடைபெற்றன. அத்தகைய அயல்நாட்டவர்க்கு இந்திய சமுதாயம் இடமளித்து அவர்களை இந்தியாவிலேயே தங்கவும் அனுமதித்தது. ஆனால், குப்தர் காலத்தில் ஜாதிமுறை மிகவும் கடுமையாக பின்பற்றப்பட்டது. பிராமணர்கள் சமுதாயத்தில் உயர் அங்கம் வகித்தனர். ஆட்சியாளர்களும், செல்வந்தர்களும் அவர்களுக்கு ஏராளமான கொடைகளை வாரி வழங்கினர். தீண்டாமை வழக்கம் இக்காலத்தில்தான் மெல்ல வளரத்தொடங்கியது. சண்டாளர்கள் சமுதாயத்திலிருந்து விலக்கி வைக்கப்பட்டதாக பாஹியான் கூறியுள்ளார். இத்தகைய கொடுமை பற்றி சீனப் பயணி விவரமாகக் குறிப்பிட்டுள்ளார்.

குப்தர் காலத்தில் மகளிர் நிலைமையும் மோசமடைந்தது. புராணங்கள் போன்ற சமயநூல்களைப் படிப்பதற்கு அவர்களுக்கு அனுமதியில்லை. ஆண்களுக்கு பெண்கள் அடிமை என்ற வழக்கம் நன்கு வேரூன்றியது. ஆனால், பெண்கள் ஆண்களால் பாதுகாக்கப்பட வேண்டும் என்றும் கருணையுடன் நடத்தப்படவேண்டும் என்றும் வலியுறுத்தப்பட்டது. 'சுயம்வரம்' நடத்தும் பழக்கம் கைவிடப்பட்டது. மனுஸ்மிரிதி பெண்களுக்கு சிறுவயதிலேயே திருமணம் செய்யவேண்டும் என்று பரிந்துரைத்தது.

---