குறுந்தொகை - 135. பாலை - தோழி கூற்று

வினையே ஆடவர்க் குயிரே வாணுதல் மனையுறை மகளிர்க் காடவர் உயிரென நமக்குரைத் தோருந் தாமே அழாஅல் தோழி அழுங்குவர் செலவே.
- பாலைபாடிய பெருங் கடுங்கோ.

தோழி! தொழில் தான் ஆண்மக்களுக்கு உயிர் ஆகும்; ஒளிபொருந்திய நெற்றியையுடைய இல்லின் கண் உறையும் மகளிர்க்கு கணவன்மாரே உயிர் ஆவரென்று நமக்கு எடுத்துக் கூறியவரும் அத்தலைவரே; அழுதலையொழிவாயாக; அவர் செல்லுதலைத் தவிர்வர்.

முடிபு: தோழி, உரைத்தோரும் தாமே; அழாஅல்; செலவு அழுங்குவர்.     

கருத்து: தலைவர் உன்னைப் பிரியாராதலின் நீ வருந்தற்க.